Čakavska Biblija 294

Pištula ol Jake: Oćeš nadazdrit, o šempijo, da je vira brez dila jalova?

Pištula ol Jake: Oćeš nadazdrit, o šempijo, da je vira brez dila jalova?
Sveti Jakov / RADIOPOSTAJA MIR MEĐUGORJE

Pištula ol Jake

Naslov i pozdrav
1 Jako, šerva ȍl Boga i Gospodȉna Isukrsta; pozdrav njiman dvanajest plemen Rasijanih.

Korist ol tantavanja

2Pravon alegrijon košiderajte, braćo moja, kal padate u kakove tantacijune 3znajuć da taštavanje vaše vire poraja pacijencu. 4Ma neka pacijenca na dilu bude najboja kako biste vi bili najboji i ciloviti, brez ikakovega manjkamenta.

5Je majika komu meju vamin mudrosti, neka je išće ȍl Boga, ki sviman daje ol gušta i brez mrnjanja, i dat će mu se. 6Ma neka je išće su viron, brez ikakovega ominjanja. Jerbo ni ča se ominja pari koda je val ol mora, uzbucan i simoj-tamo vajan. 7Neka taki ne pensa da će dobit ča ol Gospodȉna – 8čejade anima podiljenega, falšo na sviman putiman svojiman.
9Neka bratu postavjenen nizoko bude na diku kal dojde visoko, 10a bogatunu kal se ponizi. Jerbo, proć će se ka fjor ol trave: 11sunac upiče su krison pa usahne trava i fjor njezin svehne; lipota mu sa face propade. Tako će i bogatun usahnut na putiman svojiman.
12Blago ga se čejadinu ki trpi tantacijun: natantan, primit će krunu živjenja ča jȅ je Gospodîn bi prometa niman ki ga jubidu.

Posvećenje ȍl Boga
13Neka niko u tantacijunu ne reče: "Bog me tanta." Jerbo Bog ne moge tantat na zlo, i ne tanta on nikoga. 14Vengo svakoga tanta njegovo pohoćenje ča ga manta i mata. 15Ondac pohoćenje, ostajuć nosećon, poraja grih, a grih kal se učini poraja smrt.
16Nemojte se privarit, jubjena braćo moja!
17Svaki lipi dar,
svako krasno bašćinstvo je odizgari,
skalaje se ol Ćaće od luminažitadi
u ken nima minjanja
ni osina ol mine.
18On nas je porodi kako je bi namisli
besidon ol Prava
kako bismo bili ništo prvega
meju njegoviman stvorenjiman.

Prava bogojubnost
19Jemajte na pameti, braćo moja jubjena! Svak neka bude žvelat za poslušat, spor za govorenje i spor za nenavidit. 20Jerbo nenavidnost ol čovika ne čini pošćenje Božje. 21Zarad tega reterajte ol sebe svaku šporkicu i pokvarenost ča je ostala i sa svon svojon poniznošću vazmite u se usađenu besidu ka jema kripost šalvat anime vaše. 22Budte ni ča besidu činidu, a ne ni ča jurve obadajedu, mantajuć same sebe. 23Jerbo, je ko sluša besidu, a ne čini je, pari ka čejade ča fišo gleda propja svoju facu u zrcalu: 24pogleda se, gre ća i omar zaudobije kakov je prin bi. 25A ko se gleda u bogustvorenon reguli liberacijuna i kušta se uza nje, ne ka ni ča sluša i zaboravja, vengo činitej ol dila, bit će blažen u cilen lavuru svojen.

26Je ko pensa kako je bogojuban, a ne brenzaje jazika svojega, vengo inganaje srce svoje, utaman je bogojubnost njegova. 27Ispuliškana bogojubnost i na ča ni išporkana pril Bogon Ćaćon je: zauzest se za sirotinju i ude u njihovon nevoji, bit neišporkan ol vega svita.

Pošćenje
2 Braćo moja, u viri Gospodȉna našega Isukrsta nemojte se obazirat na to ko je ko! 2Je dojde na vašu šedutu čejade sa zlatnin prstenjen, u odići ča blišći, i je dojde sirotinja u isparanon robi 3pa se vi zablenete u nega sa blišćavon odićon govoreć: "Ti lipo vode sed!", a siromahu rečete: "Ti fermaj – oli sed – nonde, napodan mojih nog!", 4a niste u sebi teštardasto arbitrali i deventali se u jurate ča falšo arbitrajedu?

5Slušajte me, braćo moja jubjena: a ni Bog ne ki su svitu siromašni probra kako bidu bili bogatuni u viri i bašćinici Krajestva ča ga je bi prometa niman ki ga jubidu? 6A vi ste izružili sirotinju! Ča vas ne faštidijadu jušto baš bogatuni? Ne potežedu vas ižato baš ni po tribunaliman? 7A ne beštimadu nȉ lipo Ime na vas dozvano? 8Je propja činite krajevsku regulu prama Pismu: Jub bližnjega svojega kako samega sebe, činite dobro; 9je gledate ko je ko, u grihu ste i Regula vas arbitraje kako škanjažine. 

10Jerbo, ko se drži cile Regule, a u jelnen jurve poklekne, deventa se je u nega krivega za sve. 11Jerbo ko reče: Ne hod u kurbašćinu, reče i: Nemoj ubit. Je dunkve i ne greš u kurbašćinu, a ubiješ, deventa si se u dušmanina ol Regule. 12Tako govorte i tako činte ka i ni ki jemadu bit arbitrani po regulan od liberacijuna. 13Jerbo, ni samaritan tribunal prama nen ko ne čini samaritanšćinu; a samaritanšćina se podrugije tribunalu.

Vira i dila
14Ča koristi, braćo moja, je ko reče kako jema viru, a nima dilih? Je ga moge vira šalvat? 15Jesu kigod naš brat oli sestra goli i brez spize svakidašnje 16pa nin kogod ol vas reče: "Ajdete s miron, grijte se i dosita najijte", a da nin ne date no ča nin je potriba za tilo, kakova je korist? 17Tako i vira: je nima dilih, mrtva je u sebi.
18Ivence, moga bi kogod reć: "Ti jemaš viru, a ja jeman dila. Kaž mi svoju viru brez dilih, a ja ću tebi diliman kazat viru svoju. 19Ti viruješ kako je jedan Bog? Dobro činiš! I vrazi virujedu, i predadu."

20Oćeš nadazdrit, o šempijo, da je vira brez dila jalova? 21A Abram, ćaća naš, ni bi naša kavadinu su diliman, kal je na oltar prini Izaka, sina svojega? 22Gledaj: vira je kolaborala su diliman njegoviman i diliman se je vira isfamožitala, 23pa se je ispunilo Pismo ko govori: Povirova je Abram Bogu i zaračunalo mu se je to u pošćenje, pa se je deventa u prijateja ȍl Boga. 24Vijte: čovik se pravda diliman, a ne samon viron. 25A se ne pravda slišno, diliman, i Rahaba, kurba, kal je bila primila kurire i izvela jih drugin puten? 26Jerbo, ka ča je tilo brez anima mrtvo, tako je i vira brez dilih umrla.

Pripitomjenje jazika
3 Neka meju vamin, braćo moja, ne bude vele meštrih! Ka ča znate: bit ćemo žešće arbitrani. 2Za reć svu istinu, svi veleti grišimo. Je ko u govorenju ni sagriši, bogustvoren je čovik, šperat za fermat i cilo tilo. 3Kad uvalimo oglavu u justa žĩvēn kako bismo ga sebi podčinili, komandiramo i cilin tilon njegovin. 4Evoga i barkih: toliko jih je i žeštoki jih vitri guradu, ma majušna jih argola okriće digod hotinje ol timunjera oće. 5Tako i jazik: majušan je komadić tila, a moge se falit kako veleti tega čini.

Gledaj: kolicni ognjić, a koliki bušak užge! 6I jazik je oganj, svit krcat nepošćenjen; jazik je meju udoviman našiman, šporkaje cilo tilo i, užgan ol pakla, pali kolo ol života. 7Za reć pravo, vas porod divjači i tičic, gmazov i morskih beštij dã se pripitomit, i porod juski jih je pripitomi, 8ma jazik – zlo izvitopereno, puno otrova smrtnega – nikor ol judih ne moge pripitomit.

9Su njin blagoslivjamo Gospodȉna i Ćaću, su njin i pridajemo jude na sliku Božju stvorene: 10iž istih justijuh izahodi i blagoslov i proklešćina. Nȅ vaja, braćo moja, da to tako bude! 11A pišćina na istu bužu piša i slalko i gorko? 12Je moge, braćo moja, smokva urodit maslinan oli loza smokvan? Ni slana pišćina ne moge dat slalke vode.

Prava i falša mudrost

13Jema ko mudar i pametan meju vamin? Neka dobrin živjenjen pokaže svoja dila u mudron đentileci. 14Je u srcu jemate žuklu himbu i sumporožitad, nemojte se falit i ne faštidijajte kontra prȁven! 15Ni to mudrost ča se skalaje odizgari, vengo je zemajska, juska, vražja. 16Jerbo, digod su himba i sumporožitad, nonde je dežordin i svako zlo dilo. 17A mudrost odizgari najprvo je ćara, pa ondac mirotvorna, gracijožasta, beneficentna, puna samaritanšćine i dobrih frutih, ni falsa i brez himbe je. 18Frut ol pošćenja perfin se u miru sije niman ča činidu mir.

Kontra neslaganjiman
4 Odakle su gvere i karanja meju vamin? A nisu odovde: ol meracih ča boj bijedu u vašiman udoviman? 2Oćete, a nimate; ubĩjete i đeložate, a ne mogete uspit; muku mučite i boj bijete. Nimate, jerbo ne išćete. 3Išćete, a ne dobijete jerbo falšo išćete: kako biste potratili u pohoćenjiman svojiman.
4Kurbari! A ne znate da je prijatejstvo sa sviton dušmanšćina prama Bogu? Dunkve, kogod oće bit prijatej svita, deventaje se u dušmanina Božjega. 5Oli pensate kako Pismo pravja zaludu: Đeložo gre za animon ča stoji u namin? 6A daje on i većju graciju. Zarad tega govori:

Bog se fališan kontreštaje,
a ponizniman gracije daje.
7Adorajte se dunkve Bogu!
Reterajte se ol vraga
i uteć će ća ol vas!
8Kuštajte se uza Boga
i on će se kuštat uza vas!
Ispuliškajte ruke, vi grišni!
Ispuliškajte srca, duple kapule!
9Hlencajte, ajmekajte i cmizdrite!
Hihirenje vaše neka se deventa u plakanje
i alegrija u avelivanje!
10Budte pril Gospodȉnon nizoko
i on će vas metnut visoko!

11Ne petegulajte, braćo, jedan drugega! Ko petegulaje oli potvara brata svojega, petegulaje i potvara Regulu. A je arbitraješ Regulu, nis njezin činitej, vengo jurat ol Regule. 12Jedan je škrivan ol Regule i Jurat: Ni ki moge šalvat i ubit. A ko si ti da arbitraješ bližnjega?

Falši fidelacijun u se

13Slušajte sadar, vi ča pravjate: "Danas oli sutra poć ćemo u to i to misto, nonde ćemo ostat godišće dan, ižitavat i dobit", 14a ne znate ča će bit sutra. Jerbo ča je vaš život? Dim ste ča se sekundarno učini pa omar šparije! 15Zanamisto da govorite: "Je bude tit Gospodîn, živit ćemo i napravit vo oli no", 16vi se tote detronko floćajete! Svako je tako floćavanje pokvareno. 17Dunkve, znat ča je to činit dobrega, a ne činit ga – grih je.

Bukvica bogatuniman
5 Slušajte sadar, vi bogatuni, zahlencajte i zaajmečte zarad dežgracij ča ćedu vas ćapat! 2Misir van je isagnji, vešte vaše izile su metoperice, 3zlato van je i slebro zaruzinavilo i ruzina će njihova bit teštimonijanca kontra vas pa će kako oganj izist tila vaša! Pokesali ste misir u poslidnje dneve! 4Evoga na: dobića kosačih vaših ograd – ku ste nin uskratili – dere se, i deranje nih ča žanjedu dospilo je do ušijuh Gospodȉna nada Soldaćijan. 5U lušiman ste na zemji i u kurbašćini živili, natustili ste srca svoja za dnev ol kojačine! 6Potvorili ste i ubili pošćenjačinu: on van se ni bi kontrešta!

Pacijenca i moljenje
7Jemajte pacijence dunkve, braćo, do Arivavanja ol Gospodȉna! Enoga na: težak išćekije pricinjeni rod iž zemje, jema pacijence prama njemu doklegod ne dobije dažj, rani i kasni. 8Jemajte pacijence i vi, armajte srca jerbo se ašetaje Arivavanje ol Gospodȉna! 9Ne mrnjite jedan na drugega kako vas se ne bi arbitralo! Eno na: jurat stoji pril vratiman! 10Za muštru ol pacijence i kumpativanja pokore vazmite, braćo, profete ki su pravjali u ime ol Gospodȉna. 11Etoga: blaženiman zovemo ne ki su iskoltivali. Za pacijencu ol Joba ste čuli i vidili ste ča je bi namiri Gospodîn jerbo gracijožast je Gospodîn i samaritan!

12Prin svega, braćo, ne kunte se ni nebesiman ni zemjon, ni ikakovin drugin kunjenjen. Vaše "ši" neka bude "ši", i "ne" – "ne", da ne pojdete na tribunal.

13Je pinȁ ko meju vamin? Neka moli! Je ko pun alegrije? Neka piva fale! 14Je ko ol vas u malatiji? Neka pozove starešine ol Crikve! Ni neka molidu nada njin mažuć ga ujen u ime Gospodȉna, 15pa će moljenje vire šalvat nega maganjanega; Gospodîn će ga poldignut, i je sagriši, oprostit će mu se. 16Dunkve, ispovidajte jelni drugiman grihe i molte jedan za drugega kako biste se okrpesili! Veleti tega moge žeštoko moljenje ol pošćenjačine. 

17Ilija je bi čovik baš ka i mi; skrušeno se je pomoli da ne bi bilo dažja i dažja ni bilo na zemji tri godišća i šest misecih. 18Ondac se je jopeta pomoli i nebesa su dala dažj, a zemja je iznila svoju intradu.

19Braćo moja, je ko ol vas zabasa ol prȁva pa ga je kogod torna nase, 20jemajte na pameti: ko torna nega ča je zgriši sa puta lutanja njegovega, šalvat će ga anim njegov ol smrti i jemat će oprošćenje ol veleti grisih.

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)