Čakavska Biblija 520

Bog Gospodȉna našega Isukrsta, osposobi vas je za svako dobro dilo

Bog Gospodȉna našega Isukrsta, osposobi vas je za svako dobro dilo
FOTO REUTERS / Alessandro Bianchi

Pištula Žudijiman

IV. Vira i pacijenca

1. VIRA BIŽNONOTIH

11 A vira je jurve niko jemanje nega čen se ufamo, argumenat za sve no ča ne vidimo. 2Zarad nje stari su primili teštimonijancu.
3Viron nadazdrijemo kako su svi sviti upicanjeni besidon ȍl Boga, tako da je vo ča se vidi postalo ol nega ča se ne vidi.

4Viron je Abel prini Bogu boje posvetilišće, vengo Kajin. Prama njon je dobi teštimonijancu kako je pošćen – posvidoči je Bog nada njegoviman dariman – prama njon i mrtav jošćec govori.
5Viron je Henok bi prinesen kako ne bi vidi smrt, pa je ižvampi jerbo ga je prini Bog. Za reć pravo, prin vengo ča je bi prinesen dobi je teštimonijancu kako se je svidi Bogu. 6A brez vire ni moguće svidit se Bogu, jerbo ni ki se oće kuštat ki njemu vada viruje kako on postoji i kako on plaća niman ča ga išćedu.

7Viron Noja, upućen u no ča jošćec ni bilo došlo na vidilo, pomnjivo je učini barku zarad šalvanja svojega doma. Tako je arbitra svit i deventa se je u pošćenega bašćinika ol vire.
8Viron pozvan, Abram je obada i parti je u konfin ča ga je jema dobit u bašćinstvo, parti je ne znajuć di gre. 9Viron se je ka dogonac naseli u prometanon zemji kako u tujini, živeć u kućerku sa Izakon i Jakon, subašćiniciman istega promesa, 10jerbo je išćekiva no Misto sa fundamentiman kega je bi ugradi i stvori Bog.
11Viron je i Sara, neka je bila ostarila, zadobila kripost za ostat noseća jerbo je fidelin držala Nega ki non je bi da promes. 12I zarad tega se je, ol jelnega, i to deboto mrtvaca, i porodilo veleti njih ka zvizd na nebesiman i jarine brez broja uza kraj ol mora.

13U viri svi su ni umrli, a da nisu primili promesih, jurve su jih samo iž dalekega vidili i pozdravili priznajuć kako su furešti i dogonci na zemji. 14Za reć pravo, ki tako govoridu, ćaro kažijedu kako patriju svoju išćedu. 15Bome, da su pensali na nu iž ke su izlizli, jemali bidu jošćec prilike tornat se nase u nje. 16Ma sadar ni hlupidu za bojon, tobože ol nebes. Zarad tega se Bog ne srami zvat se Bogon njihovin: pa parića nin je Misto.
17Viron Abram, istaštan, bi je prini Izaka. Jedinca je bi prikaza on ki je primi promes, 18ken se je bilo reklo: Po Izaku će ti se nazivat raca! – 19uviren kako Bog moge i ol mrtvih uskrišivat. Zarad tega ga je isponova i dobi u slici i prilici.

20U viri, jemajuć prid jočiman no ča će doć, Izak je blagoslovi Jaku i Ezava. 21Viron Jako, umiruć, blagoslovi je oba dva sina ol Bepota i profondo se je priga naslonjen na vrh šćapa svojega. 22Viron je Bepo na umoru napomenu no obo izlaženju sinov od Israjila i dâ je befel obo svojen košću.

23Viron su Mojsiju taman porojenega tri miseca sakrivali njegovi roditeji jerbo su upanali kako je ditić lip i nisu jemali prpe pril befeliman krajevskiman. 24Viron je Mojsija, jurve je naresa, bî olbi zvat se sinon ćere ol farajuna. 25Rađe je izabra bit isfatigan skupa sa pukon ȍl Boga, vengo se momentalno okoristit su sagrišenjen. 26Većin je misiron ol blaga egipatskih smatra muku Isukrstovu, jerbo je gleda na dobiću. 27Viron je ostavi Egipat, ne strašeć se bisa ol krajih, pun pacijence koda vidi nega Nevidjivega. 28Viron je opremi pashu i škropjenje krvjon, kako se ni ki je ubiva ne bi dotaka prvorojenih od Israjila.

29Viron su pasali kroza Crveno more koda po suhen, ča su bili provali i Egipćani, ma su se potopili. 30Viron su mīrȉ ol Jerihona pali poslin ča jih se je sedan dnevih obahodilo. 31Viron Rahaba, kurba, ni pala u deštrig skupa su farmasuniman, jerbo je s miron bila primila rufijane.

32I ča jošćec da rečen? Pa majikat će mi vrimena, je počnen raspredat obo Gidejonu, Baraku, Sansonu, Jiftahu, Davidu, pa Samujelu i profetan, 33ki su po viri osvojili krajestva, činili pošćena dila, dobili no prometano, začepili pehara od lijunih, 34podušili žešćinu od ognja, utekli prid jilon ol sabje, rekuperali se ol manjkamentih, temperali se u gveri, reterali ol sebe navalicu fureštih. 35Žene su poza uskrsnućen jopeta dobile svoje pokojne. Drugi perfin, metnuti na kumpativanja, nisu se rešenjali deliberacijuna kako bi jih dopalo boje uskrsnuće. 36Drugi su jopeta ćutili tovaretanja i šupružine, pa i veruge i katabuje. 37Tukli su jih stinjan, rasicali popoli, ubijali jilon ol sabje, šemućali su vamo-tamo ubučeni u kože od ovac i koz, u skaršitadi, u afrontiman, u faštidijiman – 38svit jih ni bi mirita – lutali su po trzan, obaljenjiman, spilan i jaman.
39I svi su ni po viri, za reć pravo, primili teštimonijancu, ma nisu dobili no prometano, 40jerbo je Bog za nas bi smira čagod bojega kako ni brez nas ne bidu došli do famožitadi.

2. PREMURA OL PACIJENCE

Aviz za pacijencu
12 Zarad tega i mi, zapasani su tokin oblakon ol svidokov, odrebatijmo svaki piz i sagrišenje ča nas duši i su pacijencon trčmo u gveru ča je pril namin! 2Gledajmo fišo u Naučnika i Svršiteja ol vire, Isukrsta, ki zanamisto alegrije ča je bila pril njin podni je križ, nenavideć rugo pa sedi na desnu bandu pristoja ȍl Boga. 3Propja pomnjivo košiderajte njega, ki je iskumpati toko kontreštavanje farmasunih kontra sebe, kako – pritrudni – ne biste klonuli animon.

Fundamenti ol force
4Pa jošćec se do krvi niste oduprli u gveri kontra sagrišenja. 5A ste zaudobili bukvicu ča van se je ka siniman bila očitala:
Sinko moj, ne injoraj dišipline ol Gospodȉna
i nemoj klonut kal te on prikori.
6Jerbo kega Gopodîn jubi,
nega i dišiplinon olgaja,
šiba sina kega voli.

7Zarad vašega olgajanja kumpatijte. Bog su vamin postupa kako sa siniman: a je jema kigod sin kega ćaća sa dišiplinon ne olgaja? 8Pa, je niste poda dišiplinon, na kon su svi jemali dila, ondac ste polog, a ne dica. 9Daje, ćaće u tilu jemali smo za olgojiteje i davali smo nin reta. Pa, a se nećemo jošćec većje adoravat Ćaći od animih da živemo? 10Ni su nas propja ništo malo dnevih dišiplinon olgajali kako se je njiman činilo, a On – namin na korist, kako bismo postali partičipanti njegove svetašnjosti.

11Na prvu, bome, pari se da nikakovo olgajanje ni alegrija, vengo tuga, ma niman ki su š njin adukani poslin donosi frut pun mira i pošćenja. 12Zarad tega uspijentajte ruke ča su klonule i kolina ča šemućadu, 13izravnajte progadure za noge svoje da se čopajuć ne izvrnedu, vengo, inšoma, da olzdravidu.

V. Poravnajte progadure

1. ESHATOLOŠKO OPOMINJANJE

14Uznastojte kolo mira sa svakin! I kolo posvećenja brez kega nikor neće vidit Gospodȉna! 15Atento budte da se ko ne bi lontuna ol gracije ȍl Boga, da kakov koren ol gorčika ne bi pročedi pa da ne unese izneblušenje i ne infeta veleti njih, 16da se ko ne bi deventa u kurbara oli farmasuna kako Ezav, ki je za jelnu jedinu marendu ižita svoje prvorojenje. 17Pa znate kako je i poslin, kal je tî bašćinit blagoslov, reteran jerbo ni pronahodi mot kako mīnȕ nać moć, neka je je u suzan išća. 

18Jerbo niste došli ȕ goru ka se moge dotaknut i ki razgorenen ognju, ni škureci, tmici i fortunalu, 19ni olvraćanju trumbete ni dunjenju besid. Ki su je obadavali, zamolili su da nin se neka višje ne govori, 20jerbo nisu podnosili befele: Je se barenko i beštija dotakne briga, neka je se istuče sa stinjan! 21I no ča se je moglo vidit bilo je toko grubo da je Mojsija reka: "Ćapala me je prpa i vas predan!" 22Vengo, vi ste se kuštali ki gori Sijunu i mistu ol Boga živega, Jeruzolimu ol nebes, ki mijuniman ijad anđelih, ki svečanen zboru, 23Crikvi prvorojenac zdatanih na nebesiman, Bogu, juratu ol svih, animiman ol famožastih pošćenjačin 24i Avokatu novega Tastamenta – Isukrstu – i krvjon škropjeniškon ča govori su jošćec višje force ol ne Abelove.

25Jemajte konta obo ten da ne odrebatijete Nega ki van govori! Jerbo, je nisu utekli ni ča su odrebatili nega ki je na zemji dava dešenje, koko ćemo ondac lašnje mi je se obrnemo ol Nega ki jih daje s nebes. 26Njegov glas ondac zemju ustrguza, a sadar perfin oće prometat: Jošćec jedan put ja ću rastrest ne samo zemju, vego i nebesa. 27No "jošćec jedan put" kažije da će, ka stvoreno, svehnut no rastreseno kako bi no ostalo nerastreseno. 28Zarad tega ča smo primili krajestvo nerastreseno, iskažijemo zafaljenje iž kega činimo šervicij Bogu kako je njemu drago, sa pridanjen i sa šaržon. 29Jerbo, Bog je naš oganj ča žere.

2. KRŠĆANSKO DRŽANJE

13 Bratojubje neka dura zanavik! 2Gostojubje ne zaudobite: njin su niki, i ne znajuć, ugostili anđele! 3Spominjte se pržunjerih ko supržunjeri; faštidijanih – pa i sami ste u tilu! 4Matrimonij neka bude na falu za svih, a posteja neišporkana! Jerbo će kurbariman i šporkaćuniman arbitrat Bog. 5U živjenju nemojte se adoravat arđentariji, budte kuntenti so nin ča jemate! Pa on je reka: Ne, neću te zapustit i neću te obandunat. 6Zarad tega mogemo su filedacijunon reć:
Gospodîn mi je ajutant, ja ne predan:
ča mi ko moge?

3. JIĆE OLI GRACIJA

7Spominjte se svojih glavešin ki su van obznanjivali besidu ȍl Boga: motreć svrhu ol njihovega živjenja, jemajte u bašćinstvo njihovu viru. 8Isukrst učer i danas isti je – i vavik. 9Nemojte se dat smantat svakakoviman tujiman adukacijuniman! Jerbo je boje srce gradit su gracijon vengo su pijatancan, ke nisu bile ol koristi niman ča su se njih držali. 10Mi jemamo oltar s kega nimadu prava jist ni ča činidu šervicij Kućerku. 11Jerbo tila ol beštij, ol kih krv veli pop uniša za sagrišenje u Kapelu, palidu se vanka od logora. 12Zarad tega je i Isukrst, kako bi svojon krvjon posveti puk, bi kumpati vanka vratijuh. 

13Pa ondac izlizmo ki njemu vanka logora noseć njegovu muku, 14jerbo nimamo mi vode mista ol durade, vengo no buduće išćemo. 15Prama njemu dunkve šempre prinosimo Bogu posvetilišće ol faljenja, ča oće reć frut ol pešanj ča ispovidadu ime njegovo. 16Beneficence i lemozine nemojte zaudobit jerbo su taka posvetilišća draga Bogu!
17Obadajte svoje glavešine i hodte nin naruku, jerbo ni bdijedu nada animon vašin ka ni ča ćedu polagat konte; neka to činidu s alegrijon, a ne uzdahnjivajuć, jerbo van to ne bi bilo ol koristi.
18Molte za nas! Uvireni smo propja kako jemamo dobru košencu i u sven se oćemo lipo ponašat. 19Naročito vas perfin molin: učinte to tako kako bi van se ča prin torna nase.

Na svrhu

20A Bog ol mira,
ki po krvi ol vikovišnjega Tastamenta
ol mrtvih izvede
velega Čobanina od ovac,
Gospodȉna našega Isukrsta,
21osposobi vas je za svako dobro dilo
kako biste činili hotinje njegovo,
čini je u namin ča je njemu drago,
prama Isukrstu,
ken je glorija u sve vike vikov. Amen.

Besida ol kumpanjamenta

22Molin vas, braćo, da lipo podnesete vu besidu ol kuraja: pa samo san van skraćeno zdata! 23Jemajte na pameti: naš je brat Timotej deliberan. Je dominuta dojde, š njin ću vas vižitat.
24Pozdravte sve svoje glavešine i sve svete!
Pozdravjadu vas vi iž Italije.
25Gracija neka bude sa sviman vamin!

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)