Čakavska Biblija 295

Zakunu se je Gospodîn i neće se pokajat: Zanavik ti si pop prama redu ol Melkisedeka

Zakunu se je Gospodîn i neće se pokajat: Zanavik ti si pop prama redu ol Melkisedeka
FOTO REUTERS / Remo Casilli

Pištula Žudijiman

III. Pravo popovstvo Isukrstovo
A. Opominjanja na prvu


Zdrilost ol kršćanih
11Obo ten nas čeka velo govorenje, ma ga nĩ lakȁ besidan špjegat jerbo ste tvrdih ušijuh. 12I valo bi propja da poslin toko vrimena jurve budete meštri, a no tribuje da kogod vas isponova adukaje obo niman najvažnijiman kazivanjiman u počelu ȍl Boga. Taki ste: mlika van tribuje, a ne tvrde spize. 13Za reć pravo, kigod je jošćec na mliku, ne zna ničesa obo adukacijunu ol prava, jerbo je jošćec – ditić. 14A za ne zdrile je tvrda spiza, za ne ki jemadu užancan sviknuta ćućenja za razaznat dobrega ol zlega.

6 Zarad tega vada mimoijdemo ni adukacijun u počelu obo Isukrstu i tuka nan se dignut ki nen famožasten brez mećuć isponova fundamente: prosvićenje ol mrtvih dilih i vira ȕ Boga, 2adukavanje obo krstican i mećanje ruk, uskrsnuće mrtvih i tribunal vikovišnji. 3To ćemo perfin učinit, bome, je Bog dâ. 4Za reć pravo, niman ki su jedan put prosvićeni, i ki su se okusili dara s nebes, i ki su se deventali u partičipante ol Svetega Duha, 5i ki su se okusili Lipe beside ȍl Boga i force svita ča dohodi, 6pa su olpali, ni moguće jopeta se rinovat na prosvićenje kal nî sami jopeta propinjedu Sina ȍl Boga i činidu mu rugo. 

7Jerbo zemja ka se napije dažja ča po njon špešo pada i poraja rasadiman ča su ol koristi niman za ke se i radi, jema blagoslov ȍl Boga; 8na, perfin, ka donosi badajiku i draču, zahićena je ća, blizu je proklešćini, a svrha non je: "U oganj!"

Beside od ufanja i kuraja
9A uvireni smo, jubjeni, sve, je tako i govorimo, kako je su vamin dobro i kako ste na putu ol šalvanja. 10Pa Bog ni nepošćen kako bi zaudobi dilo vaše i jubav ča ste je pokazali imenu njegoven poslužujuć i bivajuć šervicij svetiman. 11Oćemo perfin da svak ol vas sve do svrhe pokažije tu istu žešćinu kako bi se izvršilo ufanje, 12i kako ne biste omlitavili, vengo kako biste bili bašćinici nih ki su prama viri i pacijenci bašćinili no ča nin je bilo prometano.

13Za reć pravo, kal je Bog Abramu dava promes, jerbo se ni jema su kin većin zakunut, zakunu se je samin sebon: 14Za reć pravo, blagoslovit, blagoslovit ću te i uduplat, uduplat ću te. 15I tako je Abram, su pacijencon, ćapa no prometano. 16Judi se propja kunedu so nin ko je većji i na svrhi ol svakega njihovega karanja je kunjenje za potvrđivanje (ol prava). 

17Tako i Bog: tî je bašćiniciman od promesa u obilanci demonštrirat kako se neće minjat no ča je odluči, pa je zarad tega garantira sa kunjenjen 18kako bismo po dva dila ka se ne minjadu – u kiman ni moguće da bi Bog koga ingana – mi ča se njemu utičemo jemali sforcani kuraj da se neka držimo ponuđenega ufanja. 19No nan je ka sigura i čvrsta ankora od anima ča ulizije unutra iza koltrine, 20di je ka najprvi uliza Isukrst za nas deventajuć se zanavik u Velega popa prama redu ol Melkisedeka.

B. Veli pop prama redu ol Melkisedeka


1. MELKISEDEK

Na prvu
7 Za reć pravo, ti Melkisedek, kraj šalemski, pop ȍl Boga Svevišnjega ča je izliza prama Abramu ki se je tornava sa poraženja ol krajih i blagoslovi ga je, 2i ken je Abram namini desetinu ol svega; on ki kal se prevede oće reć najprvo "kraj ol pošćenja", a ondac i kraj šalemski, tobože "kraj ol mira"; 3on, brez ćaće, brez matere, brez loze; on, ken dnevi nimadu ni počela niti živjenje jema svrhu – ča je sličan Sinu ȍl Boga, ostaje pop zanavik.

Melkisedek i popovstvo levitsko
4Pa pogledajte koki je ti ken Abram, ćaća prin ćaće, je bi da deseti dil ol najbojega iž kače. 5Za reć pravo, i ni sini Levijivi, ki primadu popovstvo jemadu befel ol regule da kupidu deseti dil ol puka, to će reć ol braće svoje neka su i na izlizla iž nidar od Abrama. 6Ma on, ki ni iž njihove loze, nabra je deseti dil od Abrama i blagoslovi ga je, njega ki nosi promes! 7A brez ikakovega šušpetanja: veći blagoslivja manjega. 8Ki ten, vode deseti dil primadu smrtni judi, a nonde ni, za kega se svidoči da žive. 9I u Abramu se, za tako reć, ubire deseti dil i od Levija ki perfin prima deseti dil, 10jerbo je jošćec bi u nidriman ćaćiniman kal je prama njemu izliza Melkisedek.

2. OD LEVITSKEGA POPOVSTVA DO NEGA OL MELKISEDEKA

Brisenje starega popovstva
11Da se je dunkve famožitad postigla prama levitsken popovstvu – jerbo je akonto njega puk dobi Regulu – kâ bi ondac bila potriba da se prama redu ol Melkisedeka metne drugi pop i da se ne imencuje prama redu od Arona? 12Za reć pravo, kal se minja popovstvo, minja se apožito i Regula. 13Jerbo je ni obo ken se to govori pripada drugen rodu, ol kega se nikor ni bi posveti oltaru. 14Poznato je kako je Gospodîn naš bi pročedi ol Jude, roda za kega Mojsija ničesa ni bi reka obo popiman. 15To je jošćec ćarije je se drugi pop meće prama slišnošću su Melkisedekon: 16posta je popon ne po Reguli bašćinstva ol tila, vengo po forci života ča se ne da deštigat. 17Jerbo se svidoči:
Zanavik ti si pop
prama redu ol Melkisedeka.
18Fermaje se dunkve regula ol prin zarad tega ča nima njezine ni force ni koristi – 19jerbo Regula ni ništa dovela do famožitadi – a oće se uvest boje ufanje, po ken se kuštajemo ki Bogu.

Neminjanje popovstva od Isukrsta
20I to se ni bilo dogodilo brez kunjenja. Jerbo su se ni brez kunjenja deventali u pope, 21a on sa kunjenjen Nega ki mu je reka:
Zakunu se je Gospodîn i neće se pokajat:
"Zanavik ti si pop".
22U tolikon miri Isukrst i je se bi deventa u garanciju ol bojega Tastamenta. 23Ki ten, veleti je bilo popov jerbo nin se je smrt pripričila da zanavik ostanedu. 24A on, jerbo ostaje zanavik, jema popovstvo ča ne prohodi. 25Zarad tega i moge do svrhe šalvavat ne ki se po njemu kuštajedu ki Bogu – vavik živ da se za njih zauzimje.
26Taki nan je Veli pop i bi ol potribe – posvećen, verđinast, puliškan, oldiljen ol farmasunih i višji ol nebes – 27ken ne tribuje da ka i ni veli popi obdan i obnoć prinišadu posvetilišće, najpri za svoja sagrišenja, a ondac i za sagrišenja ol puka. To je on učini jedan put prinišajuć samega sebe. 28Regula je propja za vele pope bila metnula jude ol manjkamentih, a besida ol kunjenja – poslin Regule – Sina famožastega zanavik.

C. Famožitad velega popa Isukrsta

1. STARA FUNCIJA NE DOSTAJE

Na prvu
8 A no glavnega u ven pravjanju je: takega jemamo Velega popa ki je se na desnu bandu pristoja Glorije na nebesiman 2ka kancilišta ol Kapele i Kućerka ol prava ča ga gradi Gospodîn, a ne čejade.
3Za reć pravo, svaki se veli pop meće kako bi priniša dare i posvetilišća. Odatle je potribno da i on jema ča bi prini. 4Inšoma, da je na zemji, ne bi bî pop jerbo postojidu ni ki prama Reguli prinišadu dare. 5Ni činidu šervicij sliki i osinu nega ol nebes, kako je upućen Mojsija kal se je bi parićava gradit kućerak: Bud atento, propja govori, učin sve na sliku i priliku ka ti se je bila ukazala na brigu.
6Vako ga je perfin dopa uzvišeniji šervicij, koko je i Avokat ol bojega Tastamenta, ča ga je ugradi na jošćec bojiman promesiman.

Falimenat starega Tastamenta
7Da je, propja, ni prvi bî brez fala, ne bi se za drugega išćalo mista. 8Za reć pravo, karajuć jih reka je:
Evo dohodidu dnevi – govori Gospodin –
kal ću sa domon od Israjila
i sa domon ol Jude
finit novi Tastamenat.

9Ne Tastamenat kakov san učini sa ćaćan njihoviman
u dnev kal san jih vaze za ruku
da jih izveden iž zemje egipatske
jerbo ni nisu jemali pacijence u mojen Tastamentu
pa san i ja zapusti njih – govori Gospodîn.
10Vengo, vo je Tastamenat su kin ću se sputit
su domon od Israjila
poslin vih dnevih – govori Gospodîn:
Regule ću svoje metnut u anim njihov
i zdatat jih u srca njihova.
I bit ću Bog njihov,
a ni puk moj.
11I neće višje nikor adukavat mišćanina
i nikor brata svojega pravjajuć:
"Nadazdri Gospodȉna",
pa svi ćedu me poznavat,
mali i veli,
12jerbo ću bit samaritan nada nepošćenjiman njihoviman
i neću se višje spominjat sagrišenjih njihovih.
13Kal govori novi, ostari ni prvi. Ča perfin višje stari i luštraje se, blizu je deštrigu.

Ustanove starega bogojubjenja ne dilujedu

9 Inšoma, i ni prvi je jema bogojubne regule i Kapelu, ma ol vega svita. 2Kućerak je propja bi upicanjen: prvi, u ken je bi kandilir, stol i prinešeni kruhovi, a zove se Kapela; 3poza drugon perfin koltrinon bi je Kućerak ča se zove Kapela nada sviman kapelan – 4u njon teribul ȍl zlāta i Bavul ol tastamenta, vas imbazdan zlaton, a u njemu važ ȍl zlāta sa mȁnōn i šupružina Aronova, ka je nikada bila procvala, i ploče ol Tastamenta; 5nada njin perfin kerubini ol Glorije ki činidu osin Pomirilišću. Obo ten ne triba sadar vele pravjat.

6Poklen je to tako upicanjeno, u prvi Kućerak šempre ulizijedu popi činit funciju, 7a u drugi jedan put priko godišća samo veli pop, i to ne brez ča je priniša za sebe i za nebacelavanja ol puka. 8Tako Sveti Duh obznanjije kako jošćec ni olkriven progadur ki Kapeli doklen jošćec jema prvega Kućerka. 9To je slika i prilika za vrime današnje: prinišadu se dari i posvetilišća ča ne mogedu u košenci isfamožitat nega ča čini funciju – 10sve same na jićiman i pićiman i svakakoviman pranjiman fundane regule ol tila, metnute do momenta od okrpesivanja.

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)