Čakavska Biblija 357

Bog nas je škapula ne po diliman ča smo jih mi u pošćenju učinili, vengo po svojon graciji

Bog nas je škapula ne po diliman ča smo jih mi u pošćenju učinili, vengo po svojon graciji
FOTO REUTERS / Remo Casilli

Pištula Titotu

Naslov i pozdrav
1 Paval, šerva ȍl Boga i apoštol Isukrstov zarad vire izabranikov Božjih i nadazdrivanja prȁva upućenega ki bogobojaznošću 2s ufanjen u život vikošnji ča ga je, prin vrimen vikovišnjih, bi prometa Bog, On ki ne floćaje, 3a u svoja doba bi je očitova besidu svoju u predikavanju ko je meni dano prama befelu Šalvadura našega, Boga: 4Titotu, praven sinu po zajedniškon viri, gracija i mir bili ȍl Boga i Isukrsta, Šalvadura našega!

Postavjanje starešin
5Zarad tega drža san te na Kreti kako biš uredi ča je ostalo i da po gradiman metneš starešine kako san ti ja bi zapovidi: 6je ko brez prikora, ol jelne žene muž, jesu mu dica virna i da jih ne kritikujedu zarad raspušćenosti i neobadavanja… 7Jerbo, proto ka guvernat ȍl Boga vada bude brez prikora: ne samovojan, ne špiritož, ne pijančina, ne furijož, ne guloz na dobiću brez blagoslova, 8vengo gostojubiv, dobroćudan, razuman, pošćen, svet, da se zna uzdržat 9i da je kapac držat se fidele beside ča se poklapa su našin adukacijunon, a i da bude moć opominjat su zdravon pamećon i pokarat ne ča se kontreštajedu.

Gvera kontra falših meštrih
10Jerbo, veleti njih ne obadajedu, puno balidu i smantajedu, najskoli ni obrizani. 11Njiman vaja začepit gubicu, jerbo puste kuće izopačijedu adukajuć jih ča se neće, i to sve zarad dobiće brez blagoslova. 12Reka je niko ol njih, baš njihov profeta: "Krećani su vavik floćuni, zle beštije, drobi ol dangube."
13Teštimonijanca je to ol prava. Zato jih grubo pokaraj kako bidu bili zdravi u viri, 14da ne padedu pol žudijske glende i regule ol judih ča se lontunajedu ol prȁva. 

15Ispuliškaniman je sve ispuliškano; niman šporkiman perfin i farmasuniman ništa ni ispuliškano, vengo su nin išporkani i razum i košenca. 16Pravjadu kako Boga poznajedu, ma diliman ga se odričedu – gadni su, ol kontreštavanja su, i ni za kakovega dobrega dila učinit nisu nastojični.

Niki obligacijuni prama veličini
2 A ti govor ča se pristoji zdraven adukacijunu: 2stari judi da budedu trizni, šerijoži, razumni, zdrave i vire i jubavi i pacijence; 3stare žene isto tako – da budedu živjenja kako spada sveciman: ne lapaćone, ne pijandore vele vina, vengo meštrovice ol dobrega, 4da opamećijedu mlaje žene neka jubidu svoje muže, dicu, 5neka budedu urazumjene, ispuliškane, dobre po kući, đentile, pokorne mužiman kako ni ne bidu beštimali besidu ȍl Boga.

6Mladiće isto tako polstakni da budedu razumni. 7U sven se pokaž primjeron za dobra dila: u adukacijunu – nepokvarenost, šerjožatost, 8zdrava besida, bresprigovorna kako bi se ni drugi izruži i kako ne bi jema ča pribotunat namin.
9Šerve neka svoje gospodare u sven obadajedu, ugađajuć nin, ne prigovarajuć nin, 10ne polkradajuć jih, vengo neka nin pokažedu svaki dobar fidelacijun kako bidu u svemu bili ornamenat adukacijunu ol Šalvadura našega, Boga.

Fundamenat obligacijunih ol staležih
11Ukazala se za reć pravo gracija ȍl Boga, šalvadurica svih judih; 12olgojila nas je da se odreknemo farmasunije i meracih so vega svita i da razumno, pošćeno i bogojubno, živemo u ven svitu, 13išćekujuć blaženo ufanje i dohođenje fale velega Boga i Šalvadura našega Isukrsta. 14On je sebe dâ za nas kako bi nas šalva ol svakakovih grisih i ispuliška sebi Puk izaberen ča ni štuf za dobra dila.
15Vo govor i priprit nin, pokaraj dajuć befel! Da te nikor neka ne nenavidi.

Općeniti obligacijuni ol virnih
3 Opomen jih da se pokoravadu glavariman i guvernamentiman, da obadajedu i da budedu pronti za svako dobro dilo, 2nikoga da ne sujedu, da ne budedu sumporozi, vengo popustjivi, da očitujedu svaku đentilecu naprama sviman judiman. 3Jerbo smo i mi nikada bili nerazumni, nepokorni, lutali smo, bili šerve ol veleti meracih i gulozarij, živili smo u zlen i himbi, bili smo gadarija, nenavidili jelni druge.

Fundamenat obligacijunih ol virnih
4Ma kal je došla dobrota i jubav prama čoviku Šalvadura našega, Boga, 5on nas je škapula ne po diliman ča smo jih mi u pošćenju učinili, vengo po svojon graciji: umivenjen novega porojenja i remuntavanja po Sveten Duhu, 6kega je u obilanci izli po namin po Isukrstu, Šalvaduru našen, 7kako bismo našli kavadinu njegovon gracijon, u ufanju, bašćinici života vikovišnjega.

Naročito svitovanje Titotu

8Besida je vo ol fidelacijuna i oću da to brez primišjanja uznastojiš, i da ni ča su povirovali Bogu takadu se pridnjačit dobriman diliman. To je dobro i na korist judiman.
9A lontunaj se od ludih kurijožitadih, i kolin, i karanjih, i batibujih: ni ol njih koristi i za ništa su. 10Sa farmasunon poslin prvega i drugega ovizavanja prikin, 11znajuć da je izopačen i da griši: on je sam sebi arbitra.

Lišne depeše, zajni pozdravi i žeje
12Kal pošjen ki tebi Artemu oli Tihika, zapriš ki meni u Nikopol jerbo san zamisli nonde prizimit. 13Zenu, avokata, i Apolona brižjivo parićaj da nin ništa ne bi falilo. 14A i naši neka se ne adukajedu pridnjačit dobrin diliman u potriban ol života kako ne bi bili jalovi.
15Pozdravjadu te svi ki su su menon.
Pozdrav ne ki nas jubidu u viri.
Gracija bila sa sviman vamin!


Pištula Filemonu

Pozdrav
1 Paval, pržunjer Isukrstov, i brat ol Timoteja: jubjenen Filemonu, kumparu našen, 2i sestri Apiji, i Arhipu, našen drugu u gveran, i Crikvi u tvojon kući. 3Gracija van i mir ȍl Boga, Ćaće našega, i Gospodȉna Isukrsta!

Zafaljenje i moljenje
4Vavik zafalijen Bogu svojen spominjuć te se u moljenjiman svojiman, 5jerbo čujen za tvoju viru i jubav ča je jemaš prama Gospodȉnu Isukrstu i prama sviman svetiman. 6Neka partičipanšćina tvoje vire kripno bude u nadazdrivanju svakega mogućega dobrega meju vamin zarad Isukrsta. 7Za reć pravo, vele si me obveseli i utiši su jubavjon svojon, brate, jerbo si okripi srca ol nih posvećenih.

Zauzimanje za Onjezima
8Zarad tega, neka jeman vas liberacijun u Isukrstu da ti zapovidin ča ti je činit, 9zarad jubavi molin, kakov jurve jesan, Paval, stari, a sadar i pržunjer Isukrstov. 10Molin te za svoje dite ča san ga porodi u verugan, za Onjezima, 11nikada tebi brez koristi, a sadar i tebi i meni vele ol koristi. 12Šajen ti ga – njega, srce svoje. 13Tî san ga jemat za se kako bi mi zanamisto tebe posluži u verugan od evanđeja. 14Ma, nisan tî priko tvoje voje kako ne bi tvoja dobrota bila na silu, vengo ol svoje voje. 

15Brž je baš zarad tega niko vrime bi ol tebe oldiljen kako biš ga dobi zaposve – 16ne ko šervu, vengo višje ol šerve, kako brata jubjenega, navlaš meni, a kamoli višje tebi, i po tilu i po Gospodȉnu. 17Je me, dunkve, držiš za druga, prim ga kako mene. 18Je ti u čen ča skrivi oli je u dugu prama tebi, to na me pripiš. 19Ja, Paval, notajen svojon rukon: ja ću platit. Kako ti ne bi reka da si i samega sebe mani obligan! 20Ajde, brate, da se su tebon okoristin u Gospodȉnu: okrip srce moje u Isukrstu! 21Ufajuć se u tvoje obadavanje, zdata san ti to pun vire da ćeš jošćec višje učinit, vengo ča te molin.

Priporuke i pozdravi
22A uza to parićaj mi i kućišća, jerbo se ufan da ću po vašiman moljenjiman vamin bit darovan.
23Pozdravja te Epafra, ča je su menon bi pržunjer u Isukrstu, Marko, Aristarh, Dema i Luka, moji kumpanji.
24Gracija Gospodȉna našega Isukrsta bila su animon vašin!

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)