Čakavska Biblija 204

Cila je Letera zdatana po inšpiracijunu ȍl Boga i na korist je za adukacijun

Cila je Letera zdatana po inšpiracijunu ȍl Boga i na korist je za adukacijun
ILUSTRACIJA

Druga pištula Timoteju

Naslov i pozdrav

1 Paval, apoštol Isukrstov po voji ȍl Boga, prama promesu ol života, života u Isukrstu, 2Timoteju, jubjenen sinu: neka su tebon budedu gracija, samaritanšćina i mir ȍl Boga Ćaće i Isukrsta, Gospodȉna našega.

Fala Bogu
3Zafalijen Bogu, ken namo jošćec ol bižnonotih puliškane košence činin šervicij, doklen te se ne pristajuć spominjen u svojiman moljenjiman i obnoć i obdan. 4Spomenen se tvojih suz i poželin vidit te kako bi se napuni alegrijon, 5jemajuć prida pameti sinceru viru ča je u tebi – nu viru ča je najpri živila u tvojon noni Lojidi i tvojon materi Ejuniki, a uviren san, i u tebi.

1. PAVAL SOKOLI TIMOTEJA NA FIDELACIJUN EVANĐEJU

Gracije ča jih je Timotej primi
6Zarad tega spominjen ti: ražešći gracijožasti dar ȍl Boga ki je u tebi ol polaganja mojih ruk. 7Jerbo ni nan Bog da anima ol bojažjivosti, vengo ol force, jubavi i pameti. 8Nemoj se sramit zarad tega teštimonijance zarad Gospodȉna našega, a ni mene, šerve njegovega. Vengo, kumpatij skupa su menon zarad evanđeja, prama forci ȍl Boga 9ki nas je šalva i pozva sveton depešon – ne naprama našiman diliman, vengo po svojen naumivanju i graciji ča nan je dana u Isukrstu prin vrimen vikovišnjih, 10a ukazala nan se je sadar figuron Šalvadura našega Isukrsta, ki je obeskripi smrt i učini je da zasja život i nesagnjivanje – prama evanđeju 11za ko san ja metnut za predikadura, apoštola i meštra.

12Zarad tega i vo kumpatijen, ma se ne sramin jerbo znan komu san povirova i uviren san kako je on kapac bašćinstvo moje uščuvat za ni Dnev.
13Na diku neka ti budedu zdrave beside ča si jih ol mene ču u viri i jubavi u Isukrstu. 14Čuvaj pricinjeno bašćinstvo po Sveten Duhu ča žive u namin.
15Obandunali su me svi u Ažiji, to znaš, meju njiman i Figel i Hermogen. 16Neka Gospodîn samaritanšćinon podari Oniziforov dom jerbo me je špešo uža utišit i ni se srami verug mojih, 17vengo kal je bi u Rimu, su vele bacelavanja me je i išća i naša. 18Neka mu dã Gospodîn nać samaritanšćinu u Gospodȉna u ni Dnev! A koko mi je tega u favur učini u Efezu, ti to znaš najboje.

Smisal kumpativanja kršćanskega apoštola
2 Ti dunkve, dite moje, krešij gracijon u Isukrstu, 2i ča si ol mene po veleti nih svidocih ču, to prines fideliman judiman ki ćedu bit kapaci i druge arbitrat. 3Š njiman muku muč ka stentani soldat Isukrstov. 4Ko boj bije, ne meće se u lavure svakidašnje kako bi se svidi vojvodi. 5I je se ko takmiči, ne daje mu se medaja je se bi takmiči vanka regule. 6Težak ki se pribije vada najprvi dobije od uroda. 7Razȕm ča govorin! Jerbo, dat će ti Gospodîn pamet u sven.

8Spominj se Isukrsta, uskrslega ol mrtvacih, iž loze ol Davida – po mojen evanđeju. 9Za nje ja muku mučin sve do verug, kako škanjažin. Ma, besida ȍl Boga ni u verugan! 10Tako da sve kumpatin zarad nih proberenih, da i ni ćapadu šalvanje, šalvanje u Isukrstu, skupa su falon vikovišnjon.
11Sigura je besida:
Jesmo š njin umrli,
š njin ćemo i živit.
12Je budemo u pacijenci,
š njin ćemo i krajevat.
Je ga se odrečemo,
i on će se nas odreć.
13Je ne budemo fideli,
on fidel ostaje.
Jerbo, ne moge se sam ol sebe odreć!

2. KONTRA PERIKULOŽITADI

Sadašnji falši meštri
14Na to spominj svidočeć pril Bogon neka ne bude karanja: ničen ni na korist, a deštrig je niman ča slušadu. 15Nastoj da ka natantan staneš pril Boga kako manoval ča se nima česa sramit, ča pošćeno predika besidu ol prava. 16Lontunaj se perfin ol farmasunskih praznih ćakul: to će većje ovancirat prama farmasuniji, 17i besida će njihova ka kankari rastočivat. Ol njih su Himenej i Filet, 18ki su zabasali ol prava pravjajuć kako se je uskrsnuće jurve dogodilo i nikiman privrćedu viru.

19Pa jopeta, fermani fundamenat ȍl Boga stoji – pol vin je timbron: Poznaje Gospodîn ne ki su njegovi i neka se lontuna ol pokvarenosti kogod da imencuje ime ol Gospodȉna.
20Pa u velon kući jema suđa ne samo ol zlatarije i arđentarije, vengo i ol drivja i ol zemje; i jelne su na diku, a druge za rugo. 21Je se ko dunkve ispuliška ol tega, bit će sud brez ruga, posvećen, ol koristi Gospodaru, za svako dobro dilo adat.

22A klon se meracih ol mlađarije! Hod za pošćenjen, viron, jubavi, miron sa sviman ki olsrca prizivjedu Gospodȉna. 23Lulava i perfin nepametna kontreštavanja reteraj ol sebe znajuć kako na porađadu karanjiman. 24A šerva ol Gospodȉna vada se ne kare, vengo triba bit đentil prama sviman, kapac adukavat, maliciju otrpit, 25kako bi su dobroton priolgaja ne ča mu se kontreštajedu i kako bi jih Bog podari prosvićenjen ter nin dâ nadazdrit ča je pravo, 26pa da jopeta budedu trizni vanka svakakove trapule ol vraga ki jih drži za šerve svojega hotinja.

Prikuložitadi ol budućih vrimen
3 A vo znaj: u zajniman daniman nastat ćedu vrimena tamašna. 2Za reć pravo, judi ćedu bit škrtuji, ingordi, fališe, beštimaduri, nevirni roditejiman, brez fale, farmasuni, 3brez jubavi, za ne pomirit se, peteguli, furijani, uzvitopereni, dušmani ol dobrega, 4tradituri, kapricijoži, prepotenti, ni ča volidu godimente višje vengo ča jubidu Boga. 5Jemadu živȍt ol bogojubjenja, ma force su se njegove odrekli. I lontunaj se ol njih!

6Za reć pravo, ol njih su ni ča se šotajedu u kuće i robidu žene ča su nakargane sagrišenjiman i ča jih vodidu svakakovi meraci: 7ne se vavik adukajedu, ma nikako da nadazdrijedu no ča je pravo. 8Ka ča su se Janes i Jambres kontreštali Mojsiji, tako se i vi, judi pokvarene pameti, u viri nenatantani, kontreštajedu praven. 9Ma nećedu višje ovancirat jerbo će nepamet vih postat kjara, kako se je to i niman jurve dogodilo.

10A ti si iša za menon u adukavanju, u živjenju, u smiranju, u viri, u kumpativanju, u jubavi, u pacijenci; 11u rufijanjiman, u pinavanjiman ka su me ćapala u Antijohiji, u Ikoniju, u Listri. Kakova san sve rufijanja podni! I iž svijuh me je šalva Gospodîn! 12A i svi ča oćedu živit bogojubno u Isukrstu, bit ćedu rufijani. 13Pokvareni judi i ni ča gatadu perfin ćedu ovancirat sve većje u pokvarenosti – imbrojavajuć i sebe i druge.

14Ti, ivence, ostan u nen u čen si adukan i u ča si virova, košideran ol koga si sve bi arbitran 15i kako olkako si bi dite poznaješ Svete letere ke jemadu priteže učinit te mudrin tebi na šalvanje po viri, viri u Isukrstu.
16Cila je Letera zdatana po inšpiracijunu ȍl Boga i na korist je za adukacijun, za karanje, načinjanje, olgajanje u pošćenju, 17kako bi čejade Božje bilo famožo, za svako dobro dilo stentano.

Feštožo kumjenje
4 Kumin te pril Bogon i Isukrston, ki ćedu arbitrat žive i mrtve, kumin te arivavanjen njegovin i krajestvon njegovin: 2predikaj Besidu, bud koltivan – u dobra doba i na gruba – kritikuj, priprit, zapovidaj su svon pacijencon i adukacijunon. 3Jerbo će doć doba kal judi nećedu moć podnit zdravega adukacijuna, vengo ćedu sebi naprama svojiman meraciman uduplavat meštre kako nin bude godilo ušiman; 4ol prȁvēga ćedu uši obrćat, a kuštavat ćedu se ki glendan. 5Ti, ivence, bud trizan u sven, kumpatij, čin dilo predikadura evanđeja, šervicij svoj učin posve!

Paval pril večer živjenja
6Jerbo, ja se jurve prinosin za posvetilišće izliveno, dospilo je vrime ol moje partence. 7Dobar san boj bi, trku svrši, viru šalva. 8Zarad tega, parićana mi je kruna ol pošćenja kon će mi u ni Dnev olvratit Gospodîn, pošćen jurat; ne samo meni, vengo i sviman ča su jubavjon čekadu njegovo dohođenje.

Zajni favuri
9Uznastoj ča prin doć ki meni! 10Jerbo me je Dema, inamoran u sadašnji svit, ostavi i iša je ća u Solun; Krescencije u Galaciju, Tit u Dalmaciju. 11Luka je jedini su menon. Markota vazmi i doved ga sa sebon jerbo mi je ol koristi za šervicij. 12Tihika san posla u Efez. 13Kabanicu ča san je ostavi u Trojadi kraj Karpa, kal dojdeš, dones. I libre, navlaš pergamene. 14Aleksandar kovač nani mi je veleti zlega. Olvrati mu je Gospodîn naprama njegovin diliman! 15Njega se i ti čuvaj jerbo se je žeštoko kontrešta besidan našiman.
16Za mojega prvega branjenja nikor ni bi uza me, svi su me bili obandunali. Neka nin se to ne računa! 17Ma je Gospodîn sta uza me, on me je sforca kako bi se po meni detronko raznila Predika da je mogedu čut svi puci; i izbavjen san iz žval od lijuna. 18Škapulat će me Gospodîn ol svakega zlega dila i šalvat za svoje krajestvo ol nebes. Njemu neka je fala u sve vike vikov! Amen!

Zajni pozdravi i žeje

19Pozdrav Prisku i Akvilu i dom od Onezofora! 20Erast je osta u Korintu, a Trofirma san ostavi u Miletu maganjanega. 21Uznastoj doć prin zime. Pozdravja te Ejubul, Pudencije, Lino, Klaudija i sva braća.
22Gospodîn bi su animon tvojin. Gracija neka bude su vamin!

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)