Čakavska Biblija 1029

Dana mi je drača u tilu, anđel ol Hudobe, da me neka buba kako se ne bi uzoholi

Dana mi je drača u tilu, anđel ol Hudobe, da me neka buba kako se ne bi uzoholi
ILUSTRACIJA

Druga pištula Korinćaniman

III. Lišno branjenje ol Pavleta

Olgovaranje na potvaranje za slabost
10 Ja, Paval, lišno vas kumin su karitadi i blagošćon Isukrstovon – ja ki kal san meju vamin tešta a tešta "bogojuban", a "pun kuraja" kal san van daleko – 2molin se da mi ne bude potribno, kal buden meju vamin, bit pun kuraja so nolikin sokoljenjen s kin se smiran kontreštat niman ki pensadu kako mi živemo po tilu. 3Jerbo, neka živemo u tilu, boj ne bijemo po tilu. 4Pa oružje za naše gvere ni ol tila, vengo je ȍl Boga sforcano za razvalivanje kaštilih. Obalijemo štroliganja 5i svaku oholiju ča se poldiže kontra nadazdrivanja Boga; i gremo zarobit svaki razum za pokorit se Isukrstu; 6i pronti smo za kaštigat sve ča ni pokorno poklen se ispuni vaša pokornost.

7Gledajte ča van je prid jočiman! Je se ko uviri da je "Isukrstov", neka samo jopeta propensa vako: kako je on Isukrstov, tako smo i mi. 8Kal bi se propja i malo većje pofali našon vlašćon – ča nan je je bi dâ Isukrst kako bismo hodili naboje, a ne nagore – ne bi mi se valo sramit. 9Samo da ne bi ispalo kako vas ja oću poplašit pištulan! 10Jerbo, "pištule, govori, jemadu piza i kriposti, ma je prisutnost ol tila brez kriposti i besida ne vaja ništa". 11Taki neka propensa vako: kakovi smo po besidan u pištulan kal nas nima, taki smo i u diliman kal smo vode.

Olgovaranje na potvaranje za čašćon se okitit
12Nismo kapaci, za reć pravo, izravnat se oli se komparat su nikiman ki sami sebe priporučadu, a nisu razumni jerbo sami sebe sebon omiradu i sami sebe sa sebon komparadu. 13Mi se perfin nećemo falit priko svake mire, vengo po miri, mizuri ča nan je je omiri Bog ko miru: za doprit sve do vas. 14Jerbo se mi ne stavjamo priko svojega, koda jošćec nismo došli do vas. Pa prvi smo propja arivali do vas su evanđejen Isukrstovin. 15Ne falimo se priko svake mire, tujiman mukan. A ufamo se da ćemo krešivanjen vaše vire meju vamin i mi – prama našiman miran – prić u svaku obilancu: 16i priko vaših duganih obznanit evanđeje, a ne se falit so nin ča je već učinjeno na tujiman konfiniman. 17Ko se fali, u Gospodȉnu neka se fali. 18Jerbo ni taštan ni ki sam sebe priporuča, vengo ni kega priporuča Gospodîn.

Pridnost ol Pavleta pril takmaciman
11 O kal biste mogli malahno podnit čagod nepameti moje! Je, istrpite me! 2Đelož san na vas propja su đeložijon ȍl Boga: jerbo san vas zaruči jelnin mužen, kako puliškanu divicu dove san vas ki Isukrstu. 3Ma me je strah da se – ka ča je guja smantala Evu svojon furbažitadi – vaši pensiri ne pokvaridu i reteradu ol prava prama Isukrstu. 4Za reć pravo, je ko dojde i predika drugega Isukrsta, kega mi nismo predikali – oli, je drugega Anima primate, kega niste primili; oli drugo evanđeje, ča ga niste ćapali – takega dobro podnosite. 5Pari mi se, etoga, da u ničen nisan manji ol "nadapoštola". 6Jerbo, je ja i nisan baš ništo bogustvoren u govorenju, ni da nisan u pameti; ivence, u sven smo van ga, i pril sviman, ukazali.

7Oli san sagrišenje učini ča san van – ponizujuć sebe kako biste se vi uzvisili – obznanjiva evanđeje ȍl Boga brez vazest šolda? 8Ol drugih san crikvih vazima, ol njih san prima dobiću kako bi moga vamin bit šervicij. I doklen san bi u vas, neka san bi u skaršitadi, nikomu nisan pâ da me vada tetoši. 9U skaršitadi su mi pomogla braća ča su van došla iž Makedonije. U sven san se čuva kako van ne bi bî težak, a i čuvat ću se. 10Tako mi prava od Isukrsta u meni, ve mi fale nikor neće vazest u ahajskin konfiniman. 11Zarad česa? Jerbo vas ne jubin? Bog to zna!

12A ča činin, činit ću i daje kako bi izbi škužu niman ča škužu išćedu kako bidu se su namin poravnali u nen čin se falidu. 13Jerbo, taka čejad falši su apoštoli, himbeni manovali, maškaradu se u apoštole Isukrstove. 14I ni to nikakov mirakul! Pa, sama se je Hudoba maškarala u anđela od luminažitadi. 15Ništa naročito, dunkve, je se i ajutanti njezini maškaradu u šerve ol pošćenja. Svrha će nin bit po diliman njihoviman.

16Jopeta van govorin: da me kogod ne bi drža za nepametnega! Za tako reć, primte me barenko i ka nepametnega kako bi se i ja ništo malo pofali. 17Ča govorin, ne govorin ol Gospodȉna, vengo ka brez pameti, u ven mećanju i držanju ko je ja san. 18Buduć da se pusti falidu po jusku, i ja ću se falit. 19Jerbo drage voje kumpatijete ne nepametne, vi pametni! 20Jerbo, kumpatijte je vas ko areštaje, je vas ko ždere, je vas ko krede, je ko čini ko je ja san, je vas ko lema priko face. 21A na rugo govorin: bili smo, jema bit, slabi! Pa jopeta, čingod ko sam sebi dã kuraja – u nepameti govorin – dajen kuraja i ja sam sebi! 22Žudiji su? I ja san! Iž Israjila su? I ja san! Raca su od Abrama? I ja san! 23Šervicij su Isukrstov? Koda san lulav, govorin: ja i jošćec višje! U nastojanjiman – prikovišje; u katabujan – prikovišje; u mlaćenjiman – priko mire; u perikuložitadi pril smrt – špešo. 

24Ol Žudijih san dobi pet putih po trideset i devet bubotac. 25Tri puta su me išibali, jedan put istukli stinjan, tri puta doživi san potapjanje, jelnu noć i dnev prove san na kulfu. 26Vijaji špešo, perikuložitadi ol rik, perikuložitadi ol škanjažinih, perikuložitadi ol nih iž svojega puka, perikuložitadi ol farmasunih, perikuložitadi u mistu, perikuložitadi na trzi, perikuložitadi na moru, perikuložitadi ol falše braće; 27u trudu i takavanjiman, špešo brez zaspat, u gladi i žeji, špešo u postu, u studenici i golotinji! 28Osin tega, uza sve drugo, ča me oblićedu judi svakega dneva, i penetravanje obo sviman crikvan. 

29Ko je oslabi, a ja da ne oslabin? Ko se je izvitoperi, a ja da se ne ražešćin? 30Je se tuka falit, svojiman ću se manjkamentiman falit. 31Bog i Ćaća ol Gospodȉna Isukrsta, blagoslovjen u vike vikov, zna da ne floćajen. 32U Damasku je guvernat ol kraja Arete čuva misto damašćansko tijuć me ćapat. 33Ma kroz ponistru su me skalali u velen krtolu priko mīrȁ pa san uteka njegoviman rukan.

12 Vaja se falit? Ne koristi bome, ma – arivat ću u viđenjiman i obznanjenju ol Gospodȉna. 2Znan čejadina u Isukrstu: prin četrnajest godišćih – je u tilu, ne znan; je vanka tila, ne znan, Bog zna – on je bi ponesen do trećih nebes. 3I znan da je ti čejadin – je u tilu, je vanka tila, ne znan, Bog zna – 4bi ponesen u raj di je ču neizgovorjive beside, ča jih čejade nesmi izustit. 5So tin ću se falit, a samin sebon neću se falit osin po svojiman manjkamentiman. 6Za reć pravo, kal bi se i ti falit, ne bi bî brez pameti; govori bi no ča je ol prava. Ma se suspregnjijen kako ne bi ko pensa obo meni višje ol nega ča vidi na meni oli ča čuje ol mene.

7I da me zarad velikosti od obznanjenjih ne bi ćapala oholija, dana mi je drača u tilu, anđel ol Hudobe, da me neka buba kako se ne bi uzoholi. 8Zarad tega san tri puta moli Gospodȉna, da se retera ol mene. A on mi je reka: 9"Dosta ti je gracija moja jerbo forca se u manjkamentu deventaje u famožitad." Najrađe ću se dunkve jošćec višje falit manjkamentiman svojiman kako bi se alogala u meni kripost od Isukrsta. 10Zarad tega guštan u manjkamentiman, afrontiman, šekadan, laskanjiman, dešperacijuniman zarad Isukrsta. Jerbo kal san baš slab, ondac san pun kriposti.

11Deventa san se u nega brez pameti! Vi ste me na to nagnali. Jerbo je tukalo da me vi priporučite buduć da ni u čen nisan manji od "nadapoštolih", perfin neka nisan ništa. 12Argumente od apoštolitadi moje reuši san meju vamin u pacijenci ol famožitadi: sinjaliman, mirakuliman i silnin diliman. 13Jerbo u čen ste to manji ol drugih crikav, osin ča van ja nisan bi na duši? Škužajte mi vo "nepošćenje". 14Evo na, parićajen se treći put doć ki vamin i neću van bit na duši jerbo ne išćen vaše, vengo vas. Dica propja nisu obligana zgrćat roditejiman, vengo roditeji dici. 15A ja ću najradije trabujat i rastrabujat se zarad animih vaših. Je vas ja višje jubin, je da buden manje jubjen? 16Ma, neka! Ja vas nisan inkargava, vengo, "furbast", kakov jurve jesan, "inganavanjen san vas ćapa". 17Da vas brž nisan zakinu po komu ol nih ča san jih bi posla ki vamin? 18Zamoli san Titota i posla š njin brata. Da vas ni brž u čen Tito zakinu? A nismo hodili u isten animu? I po istiman stopan?

Prpa i bacelavanje ol Pavleta

19Oldavna pensate kako se pril vamin branimo. Pril Bogon u Isukrstu govorimo: sve je to, jubjeni, za vaše građenje. 20Strah me je propja da vas kal dojden brž neću nać nake kakove bi ti, i da ćete vi mene nać kakovega me ne biste tili: kako ne bi brž bilo karanjih, himbe, žešćin, inganavanjih, potvaranjih, ćakulavanjih, puhanjih, kontreštavanjih; 21da me jopeta kal dojden, ne bi ponizi Bog moj u vas kako ne bi mora cmizdrit nada pustiman ki su prin bili sagrišili, a nisu se pokajali za šporkarije, merake i kurbašćine ča su jih bili učinili.

13 Evoga, treći put gren ki vamin. Svaka šentenca neka počije na teštimonijanci dvojice oli trojice svidokov. 2Niman ki su prin sagrišili i sviman drugiman reka san jurve i jopeta – ka i ondac kal san drugi put bî, tako i sadar kal me nĩ – unaprid pravjan: je jopeta dojden, neću šparenjat. 3Jerbo vi išćete argumenat kako u meni govori Isukrst ki prama vamin ni brez kriposti, vengo je sforcan meju vamin. 4I bi je propet, za reć pravo, zarad manjkamenta, ma žive prama forci ȍl Boga. I mi smo, za tako reć, maganjani u njemu, ma ćemo zarad force ȍl Boga živit š njin za vas.

5Sami sebe taštajte, jeste u viri! Sami sebe kontrolajte! A ne nadazdrijete sami sebe: da je Isukrst u vamin? Perfin, niste kako spada. 6A nadazdrit ćete, ufan se, da smo mi baš kako spada. 7Molimo se Bogu da ne činite nikakovega zlega; ne da se mi pokažemo kako spada, vengo da vi dobrega činite, pa makar mi izašli na kraju i ne baš nako kako spada. 8Jerbo ničesa ne mogemo učinit kontra nen ča je ol prava, vengo samo za no ča je ol prava. 9Je, veselimo se kal smo miškinjasti, a vi pokripjeni. Za to se i molimo, za vašu famožitad. 10To van pišen doklen me nima da, kal me bude, ne bi mora grubo postupat su vlašćon ča mi je je Gospodîn bi da za građenje, a ne za raskopavanje.

Na svrhu

Sokoljenje. Pozdravi. Žeje
11Za tako reć, braćo, veselte se, holte ki famožitadi, tište se, lipo se gledajte, mir gojte i Bog ol jubavi i mira bit će su vamin.
12Pozdravte jedan drugega svetin pojupcen.
Pozdravjadu vas svi sveti.
13Gracija ol Gospodȉna Isukrsta, jubav Boga i družba Svetega Duha neka bude sa sviman vamin!

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)