Čakavska Biblija 585

Vi ste, jema bit, letera od Isukrsta kon smo mi učinili šervicij, Animon ȍl Boga živega

Vi ste, jema bit, letera od Isukrsta kon smo mi učinili šervicij, Animon ȍl Boga živega
ILUSTRACIJA

Druga pištula Korinćaniman

Na prvu

Naslov, pozdrav i zafaljenje

1 Paval, po voji ȍl Boga apoštol Isukrstov, i brat Timotej: Crikvi Božjon u Korintu sa sviman svetiman u cilon Ahaji. 2Gracija i mir ȍl Boga, Ćaće našega, i Gospodȉna Isukrsta neka bude su vamin!

3Blagoslovjen Bog i Ćaća ol Gospodȉna našega Isukrsta, Ćaća ol gracije i Bog ol svakega tišenja! 4On nas tiši u svakon našon nenadinji kako bismo i mi sve ki su u nenadinji mogli tišit nin tišenjen kin nas i same tiši Bog. 5Jerbo ka ča je obilanca Isukrstovih kumpativanjih u namin, tako je po Isukrstu i obilanca tišenjih naših. 6Bili mi nenadinjan pričepjeni, za vaše je to tišenje i šalvanje; bili utišeni, za vaše je tišenje – ol koristi: kako biste su pacijencon ispinali ista kumpativanja ča jih i mi trpimo. 

7I tako je sforcano ufanje naše obo vamin jerbo znamo: ka ča ste partičipanti ol kumpativanjih, tako ste i ol tišenja. 8Ne bismo propja tili, braćo, da ne znate za nenadinju ča nas je ćapala u Ažiji. Bili smo priko svake mire, priko force, inkargani pa smo jurve penetrali i za život. 9Ma, u sebi smo primili i šentencu nȁ smrt kako se ne bismo ufali u same sebe, vengo ȕ Boga ki uskrisije mrtvace. 10On nas je ol take smrti šalva i šalvat će nas; u nje se ufamo, on će nas i daje šalvavat. 11A i vi ćete nan pomagat moljenjen kako bidu pusti za nas zafalivali Bogu zarad gracije ka nan je dana akonto priporučanjih veleti njih.

I. Osvrćanje na pasane nenadinje

Zarad česa je Paval promini naumivanje obo vijaju
12A vo je naša fala: teštimonijanca naše košence kako smo u svitu živili – navlaš prama vamin – u posvećenosti i sinceritadi ȍl Boga, ne u mudrosti ol tila, vengo u graciji ȍl Boga. 13Pa i ne zdatajemo van drugo osin vega ča štijete i kapite; a ufan se kako ćete i do kraja kapit, 14ka ča ste nas dilon i kapili: da smo mi vaša fala ka i vi naša za Dnev ol Gospodȉna našega Isukrsta.

15Uviren u to bi san namisli najprin doć ki vamin 16i priko vas pasat u Makedoniju pa se jopeta, kako biste jemali i drugu graciju, iž Makedonije tornat nase ki vamin da me vi olkumpanjate u Judeju. 17Pa jesan brž bi blentav kal san to bi namisli? Oli ča namišjan, po tilu namišjan pa je u mene u isti momenat i "Je, je!" i "Ne, ne!" 18Bog je svidok: naša besida vamin ni "Je!" i "Ne!", 19jerbo Sin Božji, Isukrst, kega smo mi – ja i Silvan i Timotej – vamin obznanili ni bi "Da!" i "Ne!", vengo u njemu je bilo "Da!". 20Za reć pravo, svi promesi ȍl Boga u njemu su "Da!". I zarad tega po njemu i naš "Amen!", Bogu na falu! 21A Bog je ni ki nas skupa su vamin potvrđije za Isukrsta; on nas je i pomaza, 22on nas je i timbra i u srca je naša da tolu – Anima.

23A ja zazivjen Boga za svidoka: anima mi mojega, kako bi vas delibera ol tega, nisan višje dohodi u Korint. 24Pa nismo mi gospodari vire vaše, vengo kumpanji vaši u alegriji. Jerbo u viri jemate pacijence.

2 Odluči san dunkve u sebi kako neću ki vamin jopeta doć s avelivanjen. 2Jerbo, je ja vas avelijen, a ko će mene razdivertit je ne bude nega kega ja avelin? 3Zarad tega san van to i zdata kako me, kal dojden, ne bidu avelili ni ki bi mi jemali bit zarad alegrije. Propja se ufan u svih vas da je moja alegrija – alegrija ol svih vas. 4Zdatava san van za reć pravo su veleti suz, iž vele nenadinje i dešperacijuna u srcu: ne kako biste se vi avelili, vengo kako biste upoznali moju velu jubav prama vamin.

5Je me ko aveli, ni aveli mene, vengo u niku ruku – da ne bi ča incesa – svih vas. 6Taken je dosta ni kaštig ol većine 7pa ga vi radije pomilujte i utište kako ga avelivanje priko mire ne bi islomilo. 8Zarad tega vas molin, pokažte mu jubav. 9Pa zarad tega san van i bi zdatava kako bi vidi jeste bili natantani, i jeste u sven bili obadavali. 10Komu dunkve vi budete škužali, ten ću i ja; jerbo i ja, je komu ča škužan, škužajen zarad vas – prid Isukrston, 11kako nas Sotona ne bi ingana. Jerbo znamo njegova smiranja!

Šervicij od apoštolih
12Poklen san bi ariva u Trojadu zarad evanđeja Isukrstovega, neka su mi se bila otvorila vrata u Gospodȉnu, 13ni mi bilo animu spokoja ča nisan naša Titota, brata svojega; pozdravi san se ondac su njiman i parti put Makedonije. 14Ma, Bogu fala, ki nas u Isukrstu vavik proslavja i rastrkaje po namin na svaken mistu vonj nadazdrivanja svojega. 15Je, Isukrstov smo mušć Bogu i meju niman ki se šalvajedu i meju niman ki se deštrigajedu: 16viman vonj iž smrti za smrt, niman vonj iz života za život. A ko je za to kapac? 17Za reć pravo, mi nismo kako ni pusti ki baratadu su besidon ȍl Boga, vengo sincero – ka ȍl Boga pril Bogon – u Isukrstu pravjamo.

3 Je jopeta počimjemo sami sebe priporučat? Oli je tribamo, ka niki, priporučene letere na vas oli ol vas? 2Vi ste letera naša, zdatana u srciman vašiman; znadu ga i štijedu svi judi. 3Vi ste, jema bit, letera od Isukrsta kon smo mi učinili šervicij, zdatano ne crnilon, vengo Animon ȍl Boga živega; ne na pločan ol stinje, vengo na pločan ol mesa, u srciman.

4Taki fidelacijun jemamo po Isukrstu ȕ Boga. 5Ne koda smo sami sebon, ko ol sebe, kapaci ča namislit, vengo naša je bogustvorenost ȍl Boga. 6On nas je opremi za bit šervicij noven Tastamentu, ne ol šlova, vengo od Anima; jerbo šlovo ubije, a Anim oživjije. 7Pa, je šervicij ol smrti, šloviman izduban u stinji, bi tako famožast da sini od Israjila nisu mogli pogledat u facu ol Mojsije zarad fale ol face njegove ča pasaje, 8koko će ondac falon većji bit šervicij od Anima? 9Jerbo, je šervicij ol kaštiga bi faljen, veleti je većje faljen šervicij ol pošćenja. 10I propja nĩ ni bilo proslavjeno no ča je u tolikon miri bilo proslavjeno, je se stane mećat su velon falon. 11Jerbo, je no ča prohodi bilo faljeno, veleti je većje fale vo ča ostaje.

12Jemajuć dunkve taki fidelacijun, pristupamo sa cilon otvorenošćon, 13ma ne ko Mojsija ki je meća vizerinu na facu kako sini od Israjila ne bidu vidili finivanje svega ča pasaje. 14Ma, inkordala nin se je pamet. Za reć pravo, do dneva današnjega fermaje ta vizerina štenje Starega tastamenta: ni nin obznanjeno kako je u Isukrstu no fermalo. 15Ivence, kalgod se štije Mojsija, do dneva današnjega vizerina fermaje srce njihovo.
16Ma kal se Israjil ošerva ki Gospodȉnu, skalat će se vizerina. 17Gospodîn je Anim, a di je Anim ol Gospodina, nonde je i liberacijun. 18A mi svi, ki olkrivenon facon odrebatijemo falu ol Gospodȉna, po Animu se ol Gospodȉna deventajemo u istu sliku – iž fale u falu.

4 Zarad tega, buduć da prama graciji jemamo vi šervicij, nemojmo se pridat. 2Ma, odrekli smo se ruga ol sakrivanja: ne izahodimo furbasto niti gremo izopačit besidu ȍl Boga, vengo se obznanjenjen prava priporučamo svakon košenci juskon pril Bogon. 3A je pokodušeno evanđeje naše, pokodušeno je u niman ča se deštrigajedu: 4u niman kiman je bog vega svita oćori pamet farmasunsku, kako ne bi zasjala luminažitad evanđeja ol fale Isukrstove ki je slika ȍl Boga. 5Jerbo, ne predikajemo sami sebe, vengo Isukrsta za Gospodȉna, a sebe šervan vašiman zarad Isukrsta. 6Pa Bog ki je reka: Neka iz tmice luminažitad zasvitli!, on je zablišći u srciman našiman kako bi nan nadazdrivanje fale ȍl Boga jemalo luminacijun na faci Isukrstovon.

Kumpativanja i ufanja od apoštolih

7Ti perfin misir jemamo u lopižan kako bi na famožasta forca bila apožito ȍl Boga, a ne ol nas. 8U sven stegnuti, ma ne i isturnani; ominjamo se, ma se i ne avelijemo; 9laskani, ma ne i obandunani; obaljivani, ma ne i obaljeni – 10vavik umiranje Isukrstovo u tilu raznišamo kako bi se i život Isukrstov u tilu našen ukaza. 11Za reć pravo, mi se živi vavik nȁ smrt pridajemo zarad Isukrsta kako bi se i život Isukrstov ukaza u našen smrtnen tilu. 12Tako smrt lavura u namin, život u vamin. 13A buduć da jemamo isti anim ol vire ka ča je zdatano: Povirova san, zarad tega san pravja, i mi virujemo pa zarad tega i pravjamo. 14Jerbo znamo: ni ki je uskrisi Gospodȉna Isukrsta i nas će s Isukrston uskrisit i skupa su vamin uza se metnut. 15A sve je to zarad vas: da gracija – uduplana – zafalivanjen ol veleti njih bude u obilanci Bogu na falu.

16Zarad tega se ne pridajemo. Ivence, je naše čejade izvanka isagnjije, iznutra se iz dneva u dnev rinovaje. 17Jerbo, va malenkost naše momentalne nenadinje donosi nan obilancu, sve to obilatije brime vikovišnje fale, 18buduć da namin nĩ do nega ča se vidi, vengo do nega nevidjivega: vidjivo je no momentalno, a nevidjivo – no vikovišnje.

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)