Čakavska Biblija 200

Nemoj dat da te zlo šupera, vengo dobrin šamaštraj zlo

Nemoj dat da te zlo šupera, vengo dobrin šamaštraj zlo
ILUSTRACIJA

Pištula Rimjaniman

Prosvićenje od Israjila
25Jerbo ne bi tî, braćo, da budete sami po sebi pametni, a da ne znate vo šegreto: jedan dil Israjila je ćapala ćoravost doklen ne ujdedu farmasuni u punen broju. 26I tako će se vas Israjil šalvat, kako je i bilo zdatano:
Arivat će sa Sijuna Olkupitej,
reterat će farmasuniju ol Jake.
27I to će bit moj Tastamenat š njiman,
kal vazmen grihe njihove.
28Ča se evanđeja tiče ni su propja dušmani zarad vas, ma ča se tiče probiranja ni su mezimci zarad ćaćih. 29Jerbo, Bog se ne kaje ni za svoje dare ni za zvanja.

Adukacijun od ištorije
30Za reć pravo, ka ča vi nikȁda niste bili obadavali Boga, a sadar ste po njihoven neobadavanju zadobili mižerikordiju, 31tako i ni sadar po mižerikordiji vamin demonštriranon deventali su se u ne neobadajuće kako bidu i ni sadar zadobili mižerikordiju. 32Jerbo, Bog je sve zatvori u neobadavanje kako bi se sviman moga smilovat.

Falospjev mudron mižerikordiji ȍl Boga
33Obo profundišu ol misira, i mudrosti, i nadazdrivanja ȍl Boga! Kako su neispitjiva njegova arbitravanja i nepritražjivi puti njegovi!
34Za reć pravo, ko je nadazdri pensir ol Gospodȉna,
ko ga je svitova?
35Oli: ko ga je u daru priteka
da bi mu se vajalo revanširat?
36Jerbo, sve je ol njega, i po njemu, i za njega! Njemu neka je fala u vike vikov! Amen.

II. Korišćenje: novi život u Isukrstu

Funcija od anima
12 Priklinjen vas, braćo, mižerikordijon ȍl Boga: prineste svoja tila za živo posvetilišće, sveto, Bogu drago – ka svoju funciju od anima. 2Nemojte se jelnačit so vin sviton, vengo se minjajte rinovajuć svoju pamet kako biste mogli razdilit ča je hotinje ȍl Boga, ča je dobro, Bogu drago, i naspravu.

Ponižena jubav u družbi
3Je, prama graciji ča mi je dana svaken meju vamin govorin: nemojte se pricinit višje vengo ča se vaja cinit, jurve se cinte pametno, kako je komu Bog omiri miru vire. 4Jerbo, ka ča u jelnen tilu jema veleti udov, a nimadu svi istu funciju, 5tako smo i mi, pusti, jelno tilo u Isukrstu, a svak sebice udovi su jedan drugen. 6Dare perfin jemamo drugačije prama graciji ča nan je dana: je to pronoštikavanje – neka bude po miri vire; 7je to šervicij – neka služi; je to adukacijun – neka aduka; 8je to davanje kuraja – neka daje kuraja; ko dili, neka je široke ruke; ko je guvernat – neka bacela; ko daje gracije – neka bude pun alegrije!

9Jubav neka bude brez falšitadi! Nenavidite zlo, kuštajte se uza dobro! 10Olsrca se volte pravin bratojubjen! Pritičte jelni druge rešpeton! 11U vridnosti budte žvelti, u animu žeštoki, Gospodȉnu služte! 12U ufanju budte puni alegrije, u nevoji pacijence, u moljenju nikako štufi! 13Zalet'te se ajutat svetiman u potribi, gojte gostojubivost!

14Blagoslivjajte ne ča vas rufijadu, blagoslivjajte, a ne pridajte! 15Veselte se su veseliman, hlencajte su aveliveniman! 16Isto pensajte meju sebon! Neka vas ne manta ča je visoko, vengo neka vas guloza no ča je poniženo. Ne infišajte sebi kako ste mudri! 17Nikomu zlo za zlo ne tornajte; zauzimjite se za dobro pril sviman judiman! 18Je moguće, koko bude do vas, u miru budte sa svin judiman!

19Neka van ne dohodidu drugi pol škotu, lipi moji, vengo učinte mista jidu ȍl Boga. Jerbo je zdatano: Moja je škota, ja ću je tornat, reka je Gospodîn. 20Kontra ten:
Je gladan dušmanin tvoj, daj mu jist,
i je žedan, napoj ga!
Je činiš tako,
žeravu ražeženu zagrćeš mu na teštu.
21Nemoj dat da te zlo šupera, vengo dobrin šamaštraj zlo.

Obadavanje guvernamentiman
13 Svaki anim neka se polcokaje guvernamentiman nada sebon. Jerbo nima guvernanja osin ȍl Boga: ka postojidu, ȍl Boga su postavjena. 2Zarad tega, ko se bude inkontravat su guvernamenton, Božjen se arbitracijunu kontreštaje; ki se perfin afrontajedu, sami ćedu na se navuć kaštig. 3Guvernati propja ne činidu prpu zarad dobrega, vengo zarad zlega dila. Oćeš se ne bojat guvernamenta? Dobro čin pa ćeš jemat pofalu ol nje! 

4Jerbo, na je šervicij ȍl Boga – tebi na dobro. Je činiš zlo, boj se! Ne nosi zaludu mač! Na je šervicij ȍl Boga: bis njegov istresa se na nen ki čini zlo. 5Vaja se zarad tega polcokavat, ne samo zarad bisa, vengo i zarad košence. 6Zarad tega i dacije plaćate: jerbo, šervicij su Božji ni ki se tin bavidu. 7Dajte svakomu ča mu pripada: komu daciju – daciju, komu carinu – carinu, komu rešpet – rešpet, komu ret – ret.

Jubav – ispunjenje Regule
8Prama nikomu nimajte veresije, osin da jelni druge volite. Jerbo, ko drugega voli, ispuni je Regulu. 9Za reć svu istinu: Nemoj činit privaru! Nemoj ubit! Nemoj ukrest! Nemoj zaželit! i je jema ki drugi befel, stišćan je u von besidi: Vol svojega bližnjega kako i sebe samega. 10Jubav bližnjen zlega ne čini. Dunkve, jubav je ispunjanje Regule.

Kršćanin dite od luminažitadi
11To je tin većje ča kapite vi momenat: vrime je jurve da se oda sna oprenemo jerbo nan je sadar šalvanje bližje vengo kal smo bili povirovali. 12Noć je utekla ća, dnev se je kušta! Reterajmo dunkve dila ol tmice i zagrnmo se ardenjen od luminažitadi. 13Ko po dnevu hodmo kako spada, ne u bančenjiman i oblokavanjiman, ne u kurbašćinan i šporkarijan, ne u karanjiman i đeložijan, 14vengo se zagrnte Gospodȉnon Isukrston i, u bacelavanju obo tilu, nemojte se prignjivat poda meraciman.

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)