Čakavska Biblija 600

U ufanju kontra svakega ufanja povirova je Abram

U ufanju kontra svakega ufanja povirova je Abram
ILUSTRACIJA

Pištula Rimjaniman

1. POŠĆENJE ȌL BOGA I VIRA

Obznanjenje šalvadurskega pošćenja ȍl Boga
21Sadar se je perfin vanka Regule obznanilo pošćenje ȍl Boga, posvidočena Regulon i Profetan, 22pošćenje ȍl Boga po viri Isukrsta, prama sviman ki jemadu vire. Ne, nima diference! 23Svi su za reć pravo sagrišili i tribuje nin fala ȍl Boga; 24dobili su kavadinu mukte, njegovon gracijon akonto olkupjenja u Isukrstu. 25Njega je Bog prizenta da krvjon svojon bude Pomirilišće po viri. Ti je tako obznanit svoje pošćenje kin je u svojon božanskon pacijenci propušća grihe prin tega; 26ti je obznanit svoje pošćenje u vo doba današnje – kako bi bî pošćen i da dã kavadinu nen ki je ol vire Isukrstove.

Funcija ol vire

27Di je dunkve faljenje? Izagnano je. Po kon reguli? Po reguli ol dilih? Ne, vengo po reguli ol vire. 28Propja pensamo kako čejade išće kavadinu u viri brez dilih ol Regule. 29Oli je Bog samo Bog ol Žudij? A ni i ol farmasunih? Je, i ol farmasunih. 30Jerbo, jedan je Bog: on će dat kavadinu niman obrizaniman zarad vire i neobrizaniman po viri. 31Je mi deškargajemo Regulu viron? Slobodi Bože! Kontra ten, Regulu utvrđijemo.

Abramova kavadina viron
4 Ča ćemo dunkve reć? Ča je postiga Abram, ćaća naš po pȕti? 2Za reć pravo, je Abram prama diliman naša kavadinu, jema se čin dičit, ma ne pril Bogon. 3Jerbo, ča govori Letera? Povirova je Abram u Boga i konta mu se za pošćenje. 4Nen ki lavura ne konta se dobića ko gracija, vengo ko veresija. 5Nen ki ne lavura, a viruje u Nega ki daje kavadine farmasuniman, vira se konta u pošćenje, 6ka ča i David za blaženega drži čejade ken Bog skontaje pošćenje brez dilih:
7Blaženi bili ni kiman je zlo dilo olmolano,
kiman je grih pokriven!
8Blago ga se čejadinu
ken Gospodîn ne konta krivnju.

Neovisno obo obrizivanju
9Je pripada dunkve vo blaženstvo samo niman obrizaniman oli i niman neobrizaniman? Jerbo govorimo: Vira se Abramu konta u pošćenje. 10A kako mu se konta? Jurve obrizanen oli neobrizanen? Ne obrizanen, vengo neobrizanen! 11I sinjal od obrizivanja primi je ka timbar pošćenja ko je po viri bi dobi jošćec neobrizan, kako bi bî ćaćon ol svih nih ča virujedu: neobrizanih – pa nin se skonta pošćenje – 12i su ćaćon nih obrizanih, ne nih ki su samo obrizani, vengo i nih ki uza to gredu po slidiman vire jošćec neobrizanega ćaće našega Abrama.

Neovisno obo Reguli
13Za reć pravo, promes da će bit bašćinik ol svita ni Abramu oli njegoven rodu dano vodeć se po kakovon reguli, vengo naprama pošćenju ol vire. 14Jerbo, jesu bašćinici ni iž Regule, prazna je vira, promes ol jalovice. 15Zato ča Regula poraja bis; di perfin nima Regule, nima ni falimenta. 16Pa ondac – zarad vire da bude po graciji ti promes garantiran cilen rodu, ne rodu samo po Reguli, vengo i po viri od Abrama, ki je ćaća ol svih nas – 17ka ča je i zdatano: Za ćaću pustih pucih ja te mećen – pril Nin ken je povirova, pril Bogon ki oživjije mrtvace i zove i no ča ni, ka i no ča je.

Vira od Abrama i ol kršćanih
18U ufanju kontra svakega ufanja povirova je Abram da postane ćaćon ol pustih pucih po nen ča je rečeno: Toliki će bit tvoj rod. 19Neoslabjenon viron pogleda je on na tilo svoje jurve ispaćeno – bilo mu je deboto sto godišćih – a i na krilo Sarino. 20Ma, pril promeson ȍl Boga ni šušpeta, vengo se je u viri okripi dajuć falu Bogu, 21skroz uviren da on moge učinit no ča je bi prometa. 22Zarad tega mu se je i skontalo u pošćenje.
23Ma, ni samo za nje zdatano: Skontalo mu se je, 24vengo i za nas kiman se jema skontat, namin ča virujemo u Nega ki je ol mrtvih uskrisi Isukrsta, Gospodȉna našega, 25ki je bi pridan za opačine naše i uskrišen zarad naše kavadine.

B. Šalvanje

Kavadina, tola ol šalvanja
5 Dunkve, vako u kavadini s viron, u miru smo sa Bogon po Gospodȉnu našen Isukrstu. 2Prama njemu jemamo u viri i pristup u vu graciju u kon stojimo i falimo se ufanjen u falu ȍl Boga. 3I ne samo to! Mi se dičimo i u nevojan jerbo znamo: nevoja poraja pacijencon, 4pacijenca taštacijunon, taštacijun ufanjen. 5Ufanje perfin ne čini rugo. Jerbo, jubav je ȍl Boga razlivena u srciman našiman po Duhu Sveten ki nan je dan! 6Za reć pravo, doklen smo mi jošćec bili nikakovi, Isukrst je, jurve u ta doba, za nas farmasune umri.

7Inšoma, jedva da bi ko za pošćenačinu umri; brž bi za dobrega jošćec kogod i bi kapac umrit. 8A Bog je svoju jubav prama namin bi demonštrira vako: doklen smo jošćec bili grišni, Isukrst je za nas umri. 9Koko ćemo se višje sadar, poklen smo dobili kavadinu krvjon njegovon, šalvat se po njemu ol nenavidnosti? 10Za reć pravo, jesmo se su Bogon pomirili poza smrćon Sina njegovega doklen smo se jošćec gledali kako dušmani, veleti ćemo se višje, pomireni, šalvat životon njegovin. 11I ne samo to! Dičmo se u Bogu po Gospodȉnu našen Isukrstu po ken smo zadobili pomirenje.

1. ŠKAPULAVANJE OL GRIHA, SMRTI I REGULE


Adam i Isukrst
12Zarad tega, ka ča po jelnen Čoviku ujde u svit grih i po grihu smrt, i so tin ča su svi sagrišili, na sve je jude prišla smrt… 13Za reć pravo, do Regule bilo je griha u svitu, ma se grih ne konta kal nima regule. 14Je, ma smrt je od Adama do Mojsija za tako reć krajevala i nada niman ki nisu bili sagrišili falimenton ča pari ka ni od Adama, ki je slika i prilika Nega ki jema doć.

15Ma, su daron ni kako su grihon. Jerbo, jesu grihon jelnega pusti umrli, veleti se je obilatije na svih razlila gracija ȍl Boga, gracija darovana u jelnen čoviku, Isukrstu. 16I dar – to ni ko kal je no jedan bi sagriši: jerbo arbitravanje poslin jelnega griha deventalo se je u šentencu, a dar poslin pustih grihov – kavadinon. 17Za reć svu istinu, je grihon jelnega smrt zakrajevala – po jelnen, veleti će višje ni ki primadu obilancu gracije i dara ol pošćenja krajevat u životu – po Jelnen, Isukrstu.

18Dunkve, grih ol jelnega – sviman judiman na kaštig, tako i pošćenje Jelnega – sviman judiman na kavadinu, na živjenje! 19Za reć pravo, ka ča su se neobadavanjen jelnega čejadina pusti deventali u grišnike, tako ćedu se i obadavanjen Jelnega pusti deventat u pošćenačine.

20A regula dojde da se udupla grih. Ma, di se je udupla grih, u obilanci dobije gracija: 21ko ča je grih zakrajeva smrćon, da tako i gracija krajuje pošćenjen za život vikovišnji po Isukrstu Gospodȉnu našen.

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)