Čakavska Biblija 329

Odatle i moje smiranje da i vamin u Rimu obznanin evanđeje

Odatle i moje smiranje da i vamin u Rimu obznanin evanđeje
ILUSTRACIJA

Pištula Rimjaniman

Na prvu

Proslovje
1 Paval,
šerva od Isukrsta,
zazvan za apoštola,
proberen za evanđeje ȍl Boga –
2ko je Bog unaprid bi prometa
po svojiman profetan
u svetiman Leteran
3obo Sinu svojen,
izdanku ol Davida
po tilu,
4metnuten za Sina Božjega,
u forci,
prama Animu posvećenen
uskrnućen ol mrtvacih,
obo Isukrstu, Gospodȉnu našen,
5po ken smo primili graciju i apoštolitad
kako bismo na falu njegovega imena
ki obadavanju ol vire
mogli privodit sve farmasune
6meju kiman ste i vi
zazvani od Isukrsta:
7sviman u Rimu,
mezimciman ȍl Boga,
ča su zazvani, svetiman.
Gracija van i mir
ȍl Boga, Ćaće našega,
i Gospodȉna Isukrsta.

Zafalivanje i moljenje
8Najprvo zafalijen Bogu mojemu po Isukrstu za sve vas: ča se vira vaša obznanjije po cilen svitu. 9Za reć pravo, svidok mi je Bog – ken animon svojin činin šervicij u evanđeju Sina njegovega – da vas se 10u svojiman moljenjiman spominjen brez fermavajuć i vavik molin kako bi mi se jurve jedan put s hotinjen ȍl Boga kakogod posrićilo doć ki vamin. 11Jerbo, ne vidin uru da vas vidin kako bi van prida ništo dara od anima da se sforcate, ustvari – 12da skupa su vamin skupin kuraja u zajedniškon viri, vašon i mojon. 13A ne bi tî, braćo, da ne znate: špešo san bi smira arivat ki vamin – i sve dosada bi san pripričen – da i meju vamin uberen kigod frut ka i meju drugiman puciman. 14Obligan san niman iž Grške i barbariman, i mudraciman i tukciman. 15Odatle i moje smiranje da i vamin u Rimu obznanin evanđeje.

I. Šalvanje po viri
A. Škuža


Obznanjenje aviza obo šalvanju
16Ni me sram, za reć pravo, evanđeja: no je forca ȍl Boga na šalvanje svakomu ko viruje – Žudiji najprvo, pa Grci. 17Jerbo, pošćenje se Božje ol vire ki viri u njemu olkrije ka ča je bilo zdatano: Pošćenačina će ol vire živit.

1. BIS ȌL BOGA NADA FARMASUNIMAN I ŽUDIJIMAN

Nada farmasuniman
18Olkrije se za reć pravo bis ȍl Boga na svaku farmasuniju i nepošćenje ol judih ča no pravega putidu nepošćenjen. 19Jerbo, ča se obo Bogu moge razaznat, ćaro je u njiman; jerbo nin je Bog to obznani. 20Za reć svu istinu, no ča se ne vidi ol njega, vikovišnja njegova potenca i božanstvo, jošćec namo ol postanka svita, su pamećon se naprama diliman razaznaje tako da nimadu škuže. 21Jerbo, neka su upoznali Boga, nisu mu baš ka Bogu demonštrirali ni falu ni zafalivanje, vengo su ižvampili u mozganjiman svojiman, ter je poškurilo nepametno srce njihovo. 22Kal su se činili da su pametni, poludili su i 23zaminili su falu Boga ča ne moge isagnjit likon, po životu čejadina ča se da isagnjit, i tičic, i nih na četiri noge, i gmazov.

24Zarad tega jih je Bog naprama meraciman ol srcih njihovih bi prida šporkici, pa su ni sami izružili tila svoja, 25ni ča su za Pravo – Boga su sminili floćajuć ga, častili su i davali su reta stvorenju zanamisto Stvoriteju, ki je blagoslovjen u vike vikov. Amen.

26Zarad tega jih je Bog prida meraciman ol ruga: njihove su žene zaminile općenje ol prirode so nin kontra prirode, 27a tako su i muški molali općenje prirodno su ženskon i raspalili se merakon jelni za drugiman, pa muški su muškiman na rugo činidu i sami na se primadu dobiću ča je miritadu zarad svojega raspušćenja.
28I buduć nisu jemali potribe činit se vridnin držat se nadazdrivanja ȕ Boga, prida jih je Bog tešti nevajanon, pa su činili ča se neće, 29puni svakakovega nepošćenja, malicije, gulozarije, himbe; puni đeložije, ubistva, karanja, privare, ingordije; tradituri, 30peteguli, nenavidnici Boga, beštimaduri, fališe, ni dignutega nosa, ni ča izventajedu zlega, ni ča ne obadajedu roditeje, 31ni brez pameti, farmasuni, ni brez fidelacijuna, ni brez samaritanšćine. 32Znadu za depešu ȍl Boga – da su umrit zavridili ni ki tako ča činidu – a ni ne samo da tako ča činidu, vengo gredu niza dlaku niman ča tako to činidu.

Nada Žudijiman
2 Zarad tega nimaš škuže, čoviče ča arbitraješ, kogod da si. Jerbo tin ča drugega arbitraješ, sebe kaštigaješ: jerbo to isto činiš ti ča i sam arbitraješ.
2Znamo perfin: Bog za pravo arbitraje ne ki takega ča činidu. 3Je pensaš da ćeš se škapulat ol tribunala ȍl Boga, ti čoviče ča arbitraješ ne ki tako ča činidu, a da i sam to isto činiš? 4Oli nenavidiš misir ol dobrote, pacijence i beneficence njegove ne kapijuć da te dobrota ȍl Boga ki prosvićenju privodi? 5Teštardijon svojon i srcon ko neće prosvićenja zgrćeš na se jid za Dnev bisa i obznanjenja pravednega arbitravanja ȍl Boga 6ki će učinit krejancu svaken naprama diliman: 7niman ki pacijencon u dobriman diliman išćedu falu, ret i nesagnjiće – život vikovišnji; 8puntariman i niman ča se inadidu so nin ča je pravo, a pokorniman nepošćenju – bis i nenavidnost. 9Nenadinja i dešperacijun na svaki anim ol čejadina ča čini ča se neće, najprvo na Žudija, pa na Grka; 10a fala, ret i mir svakomu ki čini dobro, najprvo Žudiju, pa Grku! 11Jerbo, Bog ne gleda ko je ko.

Kontra Reguli
12Za reć svu istinu, ni ki su brez Regule sagrišili, brez Regule ćedu se i deštrigat; i ni ki su pol Regulon sagrišili, po Reguli ćedu bit i arbitrani. 13Ne, pril Bogon nisu pošćeni ni ča obadajedu Regulu, vengo – ni ča dilujedu po Reguli nać ćedu kavadinu. 14Jerbo, kal se god farmasuni, ki nimadu Regulu, sami ol sebe držidu Regule, i nimajuć Regulu, ni su sami sebi Regula: 15demonštriradu da je no ča Regula regula zdatano u srciman njihoviman. Obo ten svidoči i no ča nin je na duši, a i košideravanja kiman se meju sebon potvaradu oli branidu. 16To će se obznanit na Dnev u ki će, po evanđeju mojemu, Bog po Isukrstu arbitrat no ča je fikano u judiman.

Žudij kako i farmasun
17Je ti perfin ki se zoveš Žudijon, ki kalmo počiješ na Reguli i jemaš Boga za diku, 18ki poznaješ Voju i po Reguli naučan razabireš ča je boje, 19ter si se uviri kako si kapo ol ćoravih, luminažitad nih u škureci, 20ni ča olgaja nerazumne, meštar nih miškinjastih jerbo u Reguli jemaš sliku i priliku pameti i prava; 21ti, dunkve, ki drugega adukaješ, samen sebi ne daješ adukacijun! Ti ki predikaš da se neka ne krede, ti kredeš! 22Ti ki braniš privaru, privaru činiš! Ti ken se gadidu falši bogi, haračiš po tempaliman! 23Ti ki se Regulon kitiš, gazeć tu Regulu Boga suješ! 24Za reć pravo, kako je zdatano, ime se ȍl Boga zarad vas beštima meju puciman.

Kontra obrizivanju
25Je, obrizivanje ti moge tribovat jes viran Reguli; je perfin nis viran Reguli, obrizivanje tvoje deventat će se u neobrizivanje. 26Je dunkve ki neobrizan čini šervicij regulan ol Regule, a se neće njegovo neobrizivanje kontat kako obrizivanje? 27I ni ki je po postanju neobrizanik, a udovoji je Reguli, arbitrat će tebi ki si, uza svo šlovo i obrizivanje, pristupnik ol Regule. 28Jerbo nĩ Žudij ki je Žudij samo izvanka, i nĩ obrizivanje no izvanka, 29na tilu, vengo pravi je Žudij ni ki je to iznutra i pravo je obrizivanje u srcu, po animu, a ne po šlovu. Faljenje mu ni ol judih, vengo ȍl Boga.

Kontra promesiman ȍl Boga
3 Ka je dunkve pridnost ol Žudij? Oli kakov je favur od obrizivanja? 2Veli, kako god pogledaš. Ka prvo: povireni su nin promesi ȍl Boga. 3Je, a ča jesu se niki iznevirili? A će njihova farmasunija fermat fidelacijun Božji? 4Slobodi Bože! Vengo, neka Bog bude ol prava, a svako čejade floćun, ka ča je i zdatano:
Da pošćen budeš naprama promesiman svojiman
i pobidiš kal te arbitravat budedu.

5Je perfin opačine naše budedu rasvitlivat pošćenje ȍl Boga, ča ćemo na to reć? A ni ondac – juski govoreć – nepošćen Bog ki čini u favur jidu? 6Slobodi Bože! Jerbo, kako će perfin Bog arbitrat svit? 7Je, propja, pravo ȍl Boga zarad mojega floćavanja obilato zablišćilo njemu na falu, zarad česa ja jošćec jeman bit arbitran kako grišnik? 8I, a nećemo "činit zlo da dojde dobro", kako nas peteguladu i kako niki govoridu da govorimo? Pošćeno jih arbitravanje čeka!

Svi su grišni
9Dunkve, ča? Jesmo boji ol njih? I ne baš! Jerbo smo taman potvorili svih, i Žudije i Grke, da su pol grihon, 10ka ča je zdatano:
Nima pošćenega ni jelnega,
11nima razumnega,
nima ga ki bi Boga išća.
12Svi su skrenuli, svi su se pokvarili,
nikor da bi čini dobro –
nijelnega nima.

13Greb otvoren grlo je njihovo,
jazikon svojin inganajedu,
pol pešnjan nin je otrov ol guje jutice,
14justa su nin puna kunjenja i gorčika;
15noge su nin žvelte za krv prolivat,
16mirine i nevoje na njihoviman su putiman,
17put ol mira ni ne poznajedu,
18prpe ȍl Boga nimadu pril jočiman.

19A znamo: čagod Regula govori, govori niman pol Regulon, da svaka justa umuknedu i vas svit kriv da bude pril Bogon. 20Zarad tega se po diliman ol Regule nikor neće škužavat pril njin. Za reć svu istinu, jedino po Reguli – grih se moge nadazdrit!

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ: Bartola Kašića, Petra Katančića, Ivana Matije Škarića, Josipa Stadlera, Franje Zagode, Ivana Evanđelista Šarića, Ljudevita Rupčića, Gracijana Raspudića, Branka Djakovića, Tomislava Ladana, Rubena Kneževića, Ivana Vrtarića; gradišćanskohrvatskih: Ivana Jakšića, Martina Meršića i Stefana Geositsa; srpskih: Vuka Stefanovića Karadžića i Luje Bakotića; zatim Varaždinske Biblije, Bosanske Biblije i Crnogorske Biblije, te latinske Vulgate, talijanske La Bibbia di Gerusalemme i francuske La Bible de Jérusalem)