Čakavska Biblija 474

Mir van ostavjan, mir van svoj dajen

Mir van ostavjan, mir van svoj dajen
ILUSTRACIJA

Evanđeje po Ivotu

2. POSLIDNJA VEČERA – PROSLAVJENJE SINA ČOVIČANSKEGA

Isukrst pere noge skulariman
13 Bilo je to pril blajdan Pashe. Isukrst je zna da je došla njegova ura da parti sa vega svita ki Ćaći, buduć da je voli svoje, nê u svitu, do svrhe jih je voli. I za večeron je đaval jurve bi uvali u srce Judi ol Šime Iškarijoskega da ga tradije. A Isukrst je zna da mu je Ćaća sve prida u ruke i da je ȍl Boga izaša i da gre ki Bogu pa se je diga ol večere, svuka veštu, vaze šugaman i pripasa se. Ondac je uli vode u levaman i sta skulariman prat noge i istirat jih sa šugamanon s kojin je bi pripasan.

Dojde tako do Šime Pere. A on će mu: "Gospodȉne! Ti meni da pereš noge?" Olgovori mu Isukrst: "Ča ja činin, ti sadar ne kapiš, ma skontat ćeš kašnje." Reče mu Pere: "Nećeš mi prat noge nikadare!" Isukrst mu olvrati: "Je te ne operen, nećeš jemat dila su menon." Na to će mu Šime Pere: "Gospodȉne, ondac ne samo noge, vengo i ruke i glavu!" Kaže mu Isukrst: "Ko je okupan, ne triba drugo da opere vengo noge – i vas je ispuliškan. I vi ste ispuliškani, ma ne svi!" Jerbo je zna ko će ga tradit. Zarad tega je i reka: "Niste svi ispuliškani."

Dunkve, kal nin je opra noge, vazme svoju veštu, jopeta sede i reče nin: "Je kapite ča san van učini? Vi me zovete Meštron i Gospodȉnon. Pravo besidite jerbo to i jesan! Jesan dunkve ja – Gospodîn i Meštar – vamin opra noge, vada i vi jelni drugiman perete noge. Ja san van demonštrira kako, da i vi činite ka ča san ja učini vamin."
"Za reć pravo, govorin van:
ni šerva veća ol gospodara
niti kurir ol nega ki ga je posla.
Je to znate, blago ga se vamin je budete tako i činili!"

Traditur je okužan
"Ne govorin obo sviman vamin! Ja znan ke san izabra! Ma – neka se ispuni Pismo: Ki se moga kruha založi, petu svoju na me poldiže."
"Jurve sadar van govorin,
prin vengo se dogodi,
da kal se dogodi
virujte da Ja jesan.
Za reć pravo, govorin van:
Ko primi nega kega ja pošjen,
mene je primi.
A ko mene primi,
prima nega ki je mene posla."
Pokle je to reka, aveliven u animu Isukrst posvidoči:
"Za reć pravo, govorin van:
jedan će me ol vas tradit!"

Skulari su se zagledali meju sebon ne znajuć obo komu to govori. A jedan ol njegovih skularih – ni, kega je Isukrst voli – bi je za stolon Isukrstu uza krilo. Šime Pere da mu je mot i reka: "Zapitaj, ko je ti obo ken govori." Vi se je kušta Isukrstu uza prsi i zapita ga je: "Gospodȉne, ko je ti?"
Isukrst olgovori: "Ni je ken ja dan usupani zalogaj." Ondac usupa zalogaj, vazme ga i da ga Judi ol Šime Iškarijoskega. Poslin zalogaja ulize u nje Sotona.

Na to mu reče Isukrst: "No ča ti je učinit, učin žvelto!" Nijedan ol njih za stolon ni kapi zarad česa mu je to reka. Kako je Juda jema vrićicu, niki su pensali da mu je Isukrst reka: "Kup ča nan tribuje za blajdan!" – oli neka da ništogod siromasiman. On dunkve vazme zalogaj i omar izajde. A bila je noć.

Razdiljanje: novi befel
Pokle je Juda iša ća, reče Isukrst:
"Sadar je proslavjen Sin Čovičanski
i Bog se je proslavi u njemu!
Je se Bog proslavi u njemu,
i njega će Bog proslavit u sebi,
i domalo će ga proslavit!

Dičice,
jošćec san malo su vamin.
Išćat ćete me,
ma, ka ča san reka Žudijiman,
govorin sadar i vamin:
di ja gren,
vi ne mogete doć.
Novi van befel dajen:
volte jedan drugega;
ka ča san ja voli vas
tako i vi volte jelni druge.
Po ven ćedu svi znat kako ste moji skulari:
je budete jemali jubavi jedan za drugega."

Isukrst i Pere
Kaže mu Šime Pere: "Gospodȉne, di to partiješ!" Isukrst mu olgovori: "Di ja partijen ti jošćec za sadar ne mogeš hodit su menon. Ma, poć ćeš poslin." Na to će mu Pere: "Gospodȉne, a zarad česa ne bi moga sadar poć su tebon? Život ću svoj dat za te!" Olgovori Isukrst: "Život ćeš svoj dat za me? Za reć pravo, govorin ti: Galo neće tri puta zakukurikat doklen me se tri puta ne odrečeš."

Isukrst – put do Ćaće
14 "Neka se ne izvitoperi srce vaše!
Virujte ȕ Boga
i u me virujte!
U Ćaće mojega doma jema veleti stanov.
Da nima, a bi van reka:
'Gren van parićat misto'?
Kad iden i parićan van misto,
jopeta ću doć i vazest vas ki sebi
da i vi budete di san ja.
A di ja gren, poznajete puta."

Reče mu Toma: "Gospodȉne, ne znamo di greš. Kako ondac mogemo poznavat puta?" Olgovori mu Isukrst:
"Ja san Put, Prȁvo i Život:
nikor ne dohodi ki Ćaći osin priko mene.
Da ste upoznali mene,
i Ćaću biste mojega bili upoznali.
Ol sadar ga i poznajete
i vidili ste ga."

Reče mu Filip: "Gospodȉne, pokaž nan Ćaću i bit će nan dosta!" Na to će mu Isukrst: "Filipe, toko san vrimena su vamin i jošćec me ne poznaješ?"
"Ko je vidi mene, vidi je i Ćaću.
Kako ti onda govoriš: 'Pokaž nan Ćaću'?
A ne viruješ
da san ja u Ćaći i Ćaća u meni?
Beside ča van jih govorin,
ne govorin van ol svoje:
Ćaća ki žive u meni čini dila svoja.
Virujte mi:
ja san u Ćaći i Ćaća u meni.
Je ne mogete nikako, zarad samih dil virujte.

Za reć pravo, govorin van:
Ko viruje u me,
činit će dila ča jih ja činin;
jošćec veća će ol njih činit
jerbo ja gren ki Ćaći.
I čagod zaišćete u moje ime,
učinit ću,
da se pofali Ćaća u Sinu.
Je ča ol mene zaišćete u moje ime,
učinit ću."

Anim se je bi prometa
"Je me volite,
moje ćete befele obadavat.
I ja ću molit Ćaću
i on će van dat drugega Utišiteja
da bude su vamin zanavik:
Anima ol Prava,
kega svit ne moge primit
jerbo ga ne vidi i ne poznaje.

Vi ga poznajete
jerbo u vas ostaje i u vamin je.
Neću vas obandunat kako sirotiće;
doć ću ki vamin.
Jošćec pinku i svit me višje neće vidit,
ma, vi ćete me vidit
jerbo ja živen i vi ćete živit.
U ni ćete dnev skontat
da san ja u Ćaći svojen
i vi u meni i ja u vamin.
Ko jema moje befele i obadava jih je,
ti me voli;
a ko mene voli,
njega će volit Ćaća moj,
i ja ću volit njega
i njemu ću se obznanit."

Kaže mu Juda, ne ni Iškarijoski: "Gospodȉne, kako to da ćeš se obznanit namin, a ne svitu?" Olgovori mu Isukrst:
"Je mene ko voli,
obadavat će moju besidu
pa će i Ćaća moj volit njega
i ki njemu ćemo doć
i u njega alogat se.
Ko mene ne voli,
beside moje ni obadava.
A besida ku obadajete ni moja,
vengo ol Ćaće ki me je posla.
To san van govori
doklen san bi meju vamin.
Utišitej – Sveti Duh,
kega će Ćaća opremit u moje ime,
učit će vas obo sven
i dozivat van u pamet
sve no ča san van ja reka.

Mir van ostavjan,
mir van svoj dajen.
Dajen van ga, ma ne ka ča svit daje.
Neka se ne ustripa srce vaše
i neka se ne straši.
Čuli ste, reka san van:
'Partijen ća i ki vamin se vraćan.'
Kal biste me volili, divertivali biste se
ča gren ki Ćaći
jerbo je Ćaća veći ol mene.

Kaza san van to sadar,
prin vengo se dogodi,
da virujete kal se dogodi.
Neću višje su vamin pusto govorit
jerbo dohodi glavar ol svita.
Kontra meni ne moge on ništa.
Ma, neka svit vidi da ja volin Ćaću
i da tako činin
kako mi je zapovidi Ćaća.
Ustante se, moća ća odavde!"

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ Petra Katančića, Ivana Matije Škarića, Valentina Čebušnika, Ivana Evanđelista Šarića, Ljudevita Rupčića i Gracijana Raspudića, te latinske Vulgate, talijanske La Bibbia di Gerusalemme i francuske La Bible de Jérusalem)