Čakavska Biblija 773

Ja san uskrsnuće i živjenje: ko u me viruje, je i umre, živit će

Ja san uskrsnuće i živjenje: ko u me viruje, je i umre, živit će
ILUSTRACIJA

Evanđeje po Ivotu

Isukrst - Dobri čobanin
10 "Za reć pravo, govorin van, kogod u zagon kraj ovac ne ulizije na vrata, vengo nindir drugo priskače, lupež je i škanjažin. A ko na vrata ulizije, čobanin je od ovac. Ten portir olprije i ovce obadajedu njegov glas. On svoje ovce zove po imenu, pa jih izvodi vanka. A pokle sve svoje izvede, gre pril njiman i ovce gredu za njin jerbo poznajedu njegov glas. Za furešton, inšoma, ne gredu, jurve bižidu ća ol njega jerbo glas ol fureštega ne pripoznajedu." Isukrst nin je ispravja tu glendu, ma ni nisu kapili ča nin je tin ti reć. 

Ondac jin Isukrst jopeta probesidi: "Za reć pravo, govorin van:
ja san laza ovcan.
Svi ča su arivali prin mene,
lupeži su i škanjažini;
pa jih ovce nisu obadavale.
Ja san laza.
Ko kroza me pasa, šalvat će se:
i ulizivat će i izlizivat
i pašu nahodit.

Lupež dohodi kako bi ukre,
zakla i ubi.
Ja san ariva da život jemadu,
da ga depju jemadu."
"Ja san čoban dobri.
Dobri čoban život svoj daje za ovce.
Težak - ki ni čoban
i čihove nisu ovce -
kal vidi vuka di dohodi,
obandunaje ovce i biži ća,
a vuk jih grabi i razlaska:
težak je
i ni mu do ovac.

Ja san dobri čobanin
i poznajen svoje
i mene poznajedu moje,
ka ča mene poznaje Ćaća
i ja poznajen Ćaću
i život svoj dajen za ovce.

Jeman i drugih ovac,
ke nisu iz vega zagona.
I njih vada doveden
i glas ćedu moj čut
i bit će jedan uvor
jedan čoban.
Zarad tega me i voli Ćaća
ča dajen život svoj
da ga jopeta vazmen.

Nikor mi ga ne vazimje,
vengo ga ja sam ol svoje polažen.
Jeman vlast položit ga,
jeman vlast jopeta ga vazest.
Ti befel dobi san ol Ćaće svojega."

Zarad tih besid jopeta su se Žudiji razdilili meju sebon. Pusti ol njih su govorili: "Jema vraga pa je porebambi! Ča ga obadajete?" Drugi su govorili: "Nisu to beside ukošenega. A sotona moge ćoraviman joči otvorit?"

VI. Blajdan ol posvećivanja Tempala


Isukrst se obznanjije zȁ Sīna ȍl Boga
Ondac se je bi feštava u Jeruzolimu Blajdan ol posvećivanja. I bila je zima. Isukrst je obahodi u Tempalu po trimu ol Salamuna. Zaokružili su ga Žudiji i govorili mu: "Doklen ćeš nan anim držat napetin? Rec pravo, jes ti Isukrst!" Isukrst nin olgovori: "Reka san van pa ne virujete.
Dila ča jih ja činin u ime Ćaće svojega - na svidočidu za me.
Ma vi ne virujete
jerbo niste ol mojih ovac.

Ovce moje obadajedu glas moj;
ja jih poznajen i nê gredu za menon.
Ja nin dajen život višnji
pa nećedu past u deštrig nikadare
i nikor jih neće ćapat iž moje ruke. Ćaća moj, ki mi jih je da,
većji je ol svih
i nikor jih ne moge zašešulat
iž ruke ol Ćaće.
Ja i Ćaća jelno smo."

Žudiji se jopeta mašidu za stinjan kako bidu ga š njiman istukli. A Isukrst nin olgovori: "Pusta san van dobra dila ol Ćaće demonštrira. Za ko ol tih dilih me tučete stinjan?" Olgovoridu mu Žudije: "Ne tučemo te stinjan zarad dobrega dila, vengo zarad beštimje: ča ti - čejade - ol sebe Boga činiš." 

Olgovori nin Isukrst: "A ni notano u vašon Reguli:
Ja san reka: vi ste bogi!
Je bogiman nazva
ne kiman je besida ȍl Boga upućenaa Pismo se ne moge poništit - kako ondac vi nen kega je Ćaća posveti i posla na svit mogete reć: 'Beštimaš!' zarad tega ča san reka: 'Sin san ȍl Boga!' Je ne činin dila Ćaće svojega, nemojte mi virovat. Ma, je činin, sve da mi i ne virujete, diliman virujte pa košiderajte i upoznajte da je Ćaća u meni i ja u Ćaći." Na to su ga jopeta tili ćapat, ma nin je on uteka iž ruk.

Isukrst gre u Pereju
I jopeta pojde na nu bandu ol Jordana - na požicijun di je prin Ivo kršćava. I osta je nonde. A veleti njih dojdedu ki njemu i rečedu mu: "Za reć pravo, Ivo ni učini nikakovega mirakula, ma se je sve obistinilo ča je bi reka obo ven." Pusti su nonde povirovali u nje.

Marot od Lazara i smrt
11 Bi je niki maganjani, Lazar iž Betanije, iž sela ol Mare i sestre non Marte. Mare je no bila pomazala Gospodȉna mašćon i protrla mu noge svojiman vlasiman. Njezin je dunkve brat bi u marotu. Sestre su zarad tega poručile Isukrstu: "Gospodȉne, evo ti ni kega voliš, u marotu je." Kal je to ču, Isukrst je reka: "Pa, malatija ni smrt, vengo je na falu Božju, da se po njon proslavi Sin ȍl Boga." 

A Isukrst je voli Martu i njezinu sestru i Lazara. Perfin, kal je ču za njegovu malatiju, osta je jošćec dva dneva u nen mistu di se je bi nahodi. Ondac poslin tega reče skulariman: "Moća jopeta u Judeju!" Kažedu mu skulari: Meštre, Žudiji su sadar išćali da te istučedu stinjan, a ti biš jopeta hodi namo?" Olgovori Isukrst: "A nima dnev dvanajest urih?
Je ko gre po dnevu, neće pošešunut
jerbo vidi luminažitad vega svita.
Je ko gre po noći, zatetura se
jerbo nima luminažitadi u njemu."

To je reka, a ondac nin je pridometnu: "Lazar, prijatej naš, spi; ma, gren ga probudit." Rekli su mu na to skulari: "Gospodȉne, je spi, olzdravit će." Ma, Isukrst je to reka obo njegovon smrti, a ni su promislili da pravja obo spavanju, obo sanjanju. Ondac nin Isukrst reče dreto-šćeto: "Lazar je umri. Ja se veselin ča nisan bi nonde, i to zarad vas - da povirujete. Vengo, pojdimo ki njemu!" Na to je Toma, ča su ga zvali Blizanac, reka skulariman: "Moća i mi da umremo š njin!"

Isukrst je život
Kal je dunkve Isukrst ariva, naša je da je ni jurve četiri dana u grebu. Betanija je bila blizu Jeruzolimu olprilike petnajest štadijih. A veleti Žudijih bilo je došlo tišit Martu i Maru zarad brata njihovega. Kal je Marta naćuhla da Isukrst dohodi, pojde prama njemu doklen je Mare ostala u kući. Marta reče Isukrstu: "Gospodȉne, da si bi vode, moj brat ne bi bî umri. Ma i sadar znan: čagod zaišćeš ȍl Boga, dat će ti." Reka non je Isukrst: "Uskrsnut će tvoj brat!" A Marta mu olgovori: "Znan da će uskrsnut obo uskrsnuću, u najzajni dnev." Reče non Isukrst: "Ja san uskrsnuće i živjenje:
ko u me viruje, je i umre, živit će.
I kogod žive i viruje u me,
neće umrit nikadare.
Je viruješ u vo?"

Olgovori mu: "Je, Gospodȉne! Ja virujen da si ti Isukrst, Sin ȍl Boga, Ni ki dohodi nȁ svīt!" Pokle je to reka, zazove svoju sestru Maru usakret i reče non: "Meštar je vode i zove te." A na, čin je to čula, žvelto se ustane i pojde ki njemu. Isukrst jošćec ni bi uliza u selo, vengo je dotada bi na mistu di ga je Marta intrala. Kal su Žudiji, ki su sa Maron bili u kući i tišili je, vidili kako se je žvelto ustala i izlizla, partili su za njon; pensali su kako na gre na grob plakat. A pokle je Mare dospila namo di je bi Isukrst i kal ga je upanala, bacila mu se je pol noge govoreć: "Gospodȉne, da si bi vode, moj brat ne bi bî umri." Kal je Isukrst vidi kako hlenca na i Žudiji ča su je kumpanjali, vas izneblušen u animu i fotan zapita: "Di ste ga položili?" Olgovorili su mu: "Gospodȉne, dojdi i vij!" I Isukrst stane plakat. Na to su Žudiji govorili: "Ma nu gledaj, kako ga je voli!" A niki meju njiman su rekli: "A on, ki je ćoraven bi otvori joči, ni moga učinit da vi ne umre?"

Lazarovo uskrišenje
Ondac Isukrst, jopeta izneblušen, pojde ki grebu. Bila je to spila, a na nju dotujan tujavac. Isukrst da befel: "Olgurajte tujavac!" Kaže mu Marta, sestra ol pokojnega: "Gospodȉne, jurve se je usmrdi. Jerbo, četvrti je dnev." Kaže non Isukrst: "A ti nisan reka: je budeš virovala, vidit ćeš falu ȍl Boga?" I olgurali su tujavac. A Isukrst poldigne joči i reče: "Ća, fala ti ča si me usliša.
Ja san zna da me vavik uslišaješ;
ma, reka san to zarad pustega skupjenega svita: da virujedu kako si me ti posla."
Pokle je to reka zadera se je iž cilega glasa: "Lazare, izahod vanka!" I mrtvac izajde, noge su mu i ruke bile vezane fašican, a obrazi zamotani šugamanon. Na to nin je reka Isukrst: "Odrište ga i molajte ga neka gre!"

Žudijske glavešine arbitrale su Isukrsta na smrt Ondac pusti Žudiji ki su bili došli ki Mariji, pokle su vidili ča je Isukrst učini, povirovali su u nje. A niki ol njih su išli farižejiman i ispravjali su nin ča je Isukrst učini. Zarad tega su glavešine popovske i farižeji sazvali Viće. Govorili su: "Ča da činimo? Vi čovik čini puste mirakule. Je ga molamo tako, svi ćedu povirovat u nje pa ćedu doć Rimjani i vazest nan vo misto i puk!" 

A jedan ol njih - Kajifa, veli pop nega godišća - reče nin: "Ne znate vi ništa. I ne pensate kako je za vas boje da jedan čovik umre za puk, vengo da vas puk propade!" Ni to reka ol svoje, vengo je ka veli pop nega godišća pronoštika da Isukrst jema umrit za puk, ma ne samo za puk vengo i zarad tega da rastrkane sin ȍl Boga skupi skupa. Dunkve, tega su dneva arbitrali ubit ga. Zarad tega Isukrst višje ni hodi vanka meju Žudijiman, vengo je odatle iša ća u konfin blizu trze, u grad ča se zove Efrajim. Tote se je fermava sa skulariman.

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ Petra Katančića, Ivana Matije Škarića, Valentina Čebušnika, Ivana Evanđelista Šarića, Ljudevita Rupčića i Gracijana Raspudića, te latinske Vulgate, talijanske La Bibbia di Gerusalemme i francuske La Bible de Jérusalem)