Čakavska Biblija 439

Ko je fedel u najmanjen, i u najvećen je fedel

Ko je fedel u najmanjen, i u najvećen je fedel
ILUSTRACIJA

Evanđeje po Luki

Guvernat ol nepošćenja
16 Pravja je i svojiman skulariman: "Bi je niki bogatun ki je jema guvernata. Vi je bi prozivan pril njin da mu rasipje poces. On ga je pozva pa mu je reka: 'Ča to čujen obo tebi? Ured konte obo svojen guvernavanju jerbo višje ne mogeš bit guvernat!' Na to je guvernat reka u sebi: 'Ča da učinin kal mi gospodar moj vazimje guvernavanje? Kopat? Niman force. Prosit? Sramin se. Znan ča ću kako bidu me primili u svoje kuće kal me maknedu iž guvernavanja.'"

I pozva je ne ča su dugovali njegoven gospodaru, jednega po jednega. Zapita je prvega: 'Koko duguješ mojemu gospodaru?' On mu je reka: ' Sto vrčih uja.' A on će mu: 'Vazmi svoju zadužnicu, žvelto sed, zdataj pedeset.' Ondac reče drugen: 'A ti, koko si ti dužan?' On je olgovori: 'Sto vrić šenice.' Reka mu je: 'Vazmi svoju zadužnicu i zdataj osandeset.'"
"I pofali gospodar guvernata ol nepošćenja ča je ašperto postupi, jerbo sini vega svita ašpertiji su prima svojiman ol nih sinih od luminažitadi."

Ne moge se bit šervicij dvaman gospodariman
"I ja vamin govorin: učinte sebi prijateje misiron ol nepošćenja, pa pokle ga nestane da vas primidu u kućerke vikovišnje."
"Ko je fedel u najmanjen, i u najvećen je fedel; a ko je u najmanjen ol nepošćenja, ol nepošćenja je i u najvećen. Dunkve, je niste bili fedeli u misiru ol nepošćenja, ko će van povirit no prȁvēga? I je niste bili fedeli akonto tujega dobrega, ko će van dat nega vašega?"
"Nijedan šerva ne moge bit šervicij dvaman gospodariman. Oli će jelnega nenavidit, a drugega volit; oli će se uza jelnega kuštat, a drugega nenavidit. Ne mogete bit šervicij Bogu i misiru."

Kontra ingordih farižejih
Sve su to slušali farižeji, ča su volili arđenteriju, i rugali su mu se. On nin je reka: "Vi se činite pošćeniman pril judiman, ma Bog poznaje srca vaša. Jerbo, ča je judiman uzvišeno, gadarija je pril Bogon."

Vikovišnost Regule
"Regula i Profete dosimjedu do Ivota, a oltada se navišća krajestvo ȍl Boga i svak se u nje na silu probije. Lašnje ćedu nebesa i zemja pasat, vengo će se deštrigat i jelna taška ol Regule."

Matrimonij se ne moge raskopat
"Kogod obanduna svoju ženu pa se oženi su drugon, čini privaru. I ko se god oženi s obandunanon ženon, čini privaru."

Bogatun i Lazar
"Bi je niki bogatun. Ubučiva se je u grimiz i tanahni lan, a priko dneva i obnoć lipo je frajava. A niki siromah, narečeni Lazar, leža je vas u čiriman pril njegovin vratiman i želi se je nasitit nin ča je padalo sa stola ol bogatuna. I pasi su dohodili i oblizivali su mu žmade."

"Pokle je siromah umri, odnili su ga anđeli u krilo od Abrama. Umri je i bogatun i bi je pokopan. Ondac u teškin mukan u paklu poldigne svoje joči pa izdalekega upana Abrama i u krilu njegoven Lazara, pa zavapi: 'Ća Abrame, smiluj se meni i pošji Lazara da usupa vrh svojega prsta u vodu i rashladi mi jazik, jerbo se veleti ludin u ven ognju.'

Reka je na to Abram: 'Sinko! Spomen se da si za života primi dobrega svojega, a tako i Lazar nega zlega. Sadar se on ovode tiši, a ti svoj boj biješ. Svrhu svega, izmeju nas i vas ciri se vela prodoca, pa ki bidu i tili prić odavde ki vamin, ne mogedu, a ni odatle ki namin nimadu priko čega pasat.'"

"Na to će bogatun: 'Molin te ondac, ća, pošji Lazara u kuću ćaće mojega. Jeman petoricu braće pa neka nin posvidoči da i ni neka ne dojdedu u misto ol muk.'
Reka je Abram: 'Jemadu Mojsiju i Profete! Neka njih poslušadu!' A on će: 'Ma ne, ća Abrame! Vengo, je dojde ko iž mrtvih ki njiman, prosvitlit ćedu se.' Reka mu je: 'Je ne obadajedu Mojsiju i Profete, nećedu povirovat sve da se i ol mrtvih ko ustane.'"

Smutnje
17 I reka je skulariman svojiman: "Ni moguće da ne dojdedu smutnje, ma, nen po ken dohodidu ja mu se radujen; je sa žrnon kolo vrata butan u more, boje mu je, vengo da iznebluši jelnega ol vih malih. Budte atento!"

Bratska pritnja
"Je falije brat tvoj, ukor ga; je se obrati, oprosti mu. Pa je se i sedan putih na dan ogriši obo tebe i sedan se putih ošerva prama tebi govoreć: 'Skužaj!', oprosti mu."

Forca ol vire
Apoštoli zamolidu Gospodȉna: "Uduplaj nan viru!" Gospodîn nin olvrati: "Da jemate vire koko je zrno ol gorušice, rekli biste von murvi: 'Izgul se s korenon i prisad se u more!' I na bi vas obadala."

Bit ponizan šervicij
"Ko će to ol vas reć šervi svojen, težaku oli čobaninu, ki se je torna iz gore: 'Brzo dojdi i sed za stol?' A mu neće, kontra ten, reć: 'Parićaj ča ću večerat pa se opaš i bud mi šervicij doklen jin i pijen; poslin ćeš i ti jist i pit?' Je duguje falu šervi jerbo je učini ča mu se je bilo zapovidilo? Tako i vi: pokle učinite sve ča van se je naredilo, recte: 'Šerve smo zaništa! Učinili smo ča nas je bilo tukalo učinit!'"

Deset gubavcih
Doklen je tako hodi na vijaj u Jeruzolim, pasava je mimo Šamariju i Galileju. Kal je uliziva u niko selo, eno na, gre prama njemu deset gubavcih. Fermali su se podaje ol njega zavapeć: "Isukrste, Meštre, pomiluj nas!" Kal jih je Isukrst upana, reka nin je: "Hodte ća, pokažte se popiman!" I doklen su hodili ća, ispuliškali su se. Jedan ol njih videć da je olzdravi, torna se je nase faleć Boga na vas glas. Baci se je na kolina ki

Isukrstoviman nogan zafalivajuć mu. A to je bi niki Šamarijanac. Ondac je Isukrst reka: "A se nisu ispuliškali njih deset? A di su na devetorica? A se ni naša nijedan ki bi se torna i dâ falu Bogu, osin vega fureštega?" A njemu je reka: "Ustan se! Hod! Tvoja te je vira šalvala!"

Bog će učinit krajestvo svoje
Zapitali su ga farižeji: "Kal će doć krajestvo ȍl Boga?" Olgovori nin je: "Krajestvo ȍl Boga ne dohodi tako da se vidi. Niti će se moć reć: 'Evo ga vode!' oli: 'Eno ga nonde!' Jerbo, evo na – krajestvo je ȍl Boga meju vamin!"

Ondac je reka skulariman: "Doć ćedu dnevi kal ćete se zaželit vidit i jedan dnev Sina Čovičanskega, ma ga nećete vidit. Govorit ćedu van: 'Eno ga nonde, evo ga vode!' Ne holte tamo i ne prugajte za njiman! Jerbo, ka ča lamp zalampa na jelnen kraju ol nebes i odrebatije se na drugen, tako će bit i sa Sinon Čovičanskin u Dnevu njegoven. Ma, prin vada on veleti pritrpi i da ga vi đeneracijun olbaci."

"I ka ča je bilo u dneve ol Noje, tako će bit i u dneve ol Sina Čovičanskega: jili su, pili, ženili se i udavali do dneva kal Noja imbarka se je u korabju. I dojde povodaj pa sve deštriga. Slišno ka ča je bilo u dneve od Lota: jili su, pili, baratavali, tramakavali, sadili, gradili. A nega dneva kal je Lot izliza iž Sodome zapahne s nebes oganj i sumpor i sve deštriga. Tako će isto bit u dnev kal se Sin Čovičanski obznani."

"U ni dnev ko bude na krovu, a prnje su mu u kući, neka se ne skalaje da jih vazme. I ko bude u gori, neka se ne obrće nase. Spomente se žene Lototove! Kogod bude uznastojat život svoj ušparat, deštrigat će ga; a ko ga deštriga, živega će ga šalvat."

"Govorin van, nẽ ćedu noći bit njih dva u posteji: jednega će se vazest, drugega molat. Dvi ćedu mlit skupa: jelna će se vazest, druga molat." Zapitali su ga na to: "Di to, Gospodȉne?" A on nin je reka: "Di budedu krepaline, nonde ćedu se kupit i gravani."

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ Petra Katančića, Ivana Matije Škarića, Valentina Čebušnika, Ivana Evanđelista Šarića, Ljudevita Rupčića i Gracijana Raspudića, te latinske Vulgate, talijanske La Bibbia di Gerusalemme i francuske La Bible de Jérusalem)