Čakavska Biblija 745

I ne uved nas u tantacijun!

I ne uved nas u tantacijun!
ILUSTRACIJA

Evanđeje po Luki

Poslanje sedandesetidvojice
10 Poslin tega odredi je Gospodîn drugu sedandesetidvojicu skularih i posla jih je po dvojicu pril sebon u svaki grad i u svako misto di je jema voju doć. Govori nin je: "Intrada je vela, ma manovalih je pinku. Dunkve, molte gospodara od intrade da manovale svoje pošje u jematvu svoju. Hodte! Evo na, šajen vas ka jance pril vuke. Ne potežte za sebon ni sakete, ni borše, ni obuće. I nikoga puten ne pozdravjajte.

U kugod kuću ulizete, najprvo recte: 'Mir von kući!' Je bude nonde ko prijatej ol mira, počinut će na njemu mir vaš. A je ne bude, tornat će se na vas. U ton kući ostante, jijte i pijte ča se god u njih najde. Jerbo, vridan je manoval dobiće svoje. Nemojte prilazit iz kuće u kuću."
"Kal u koji grad ujdete pa vas primidu, jijte ča van se ponudi i ličte ne u marotu ki su u njemu. I govorte nin: 'Kuštalo van se je krajestvo ȍl Boga!' A kal u niki grad ujdete pa vas ne primidu, izajdite na njegove kale i recte: 'I prašinu vašega mista, ka nan se je ćapala obo noge, otresamo sa sebe! Inšoma, znajte vo: Kuštalo se je krajestvo ȍl Boga!' Govorin van: Sodomjaniman će u ni dnev bit lašje vengo ten gradu."

Prićenje neobraćenin gradiman
Korozajine, ja ti se radujen! Betsajido, ja ti se radujen! Da su se u Tiru i Sidonu dogodili mirakuli ča su se dogodili u vamin, oldavna biste jurve, sideć u kostreti i lugu, činili pokoru. Ma Tiru i Sidonu bit će na Sudu lašnje vengo vamin.
I ti Kafarnajumu.
A ćeš se do nebes uzveličat?
Do u Podzemje ćeš se surgat.
Ko vas sluša, mene sluša; ko vas ne mari, mene ne mari. A ko mene ne mari, ne mari ni nega ki je mene posla."

Pravi razlog alegrije od apoštolih
Poslin su se tornali njih sedandesetidva s alegrijon govoreć: "Gospodȉne, i zli animi nan se prignjijedu na tvoje ime!" A on nin je reka: "Gleda san Đavla kako se je koda lamp skala s nebes. Na, dâ san van vlast da čepate po gujan i macagrabuniman i po svon sili dušmanih i ništa van neće naškodit. Ma ne veselte se ča van se animi prignjijedu, vengo se veselte ča su van imena zdatana na nebesiman."

Evanđeje obznanjeno maliman
Tega istega momenta uzveseli se je Isukrst u Duhu Sveten govoreć: "Falin te, Ćaća, Gospodaru ol nebes i zemje, ča si vo sakri ol promućurnih i pametnih, a obznani si maliman. Je, Ća! Tako se je tebi dopalo! Sve mi je prida Ćaća moj i nikor ne zna ko je Sin – osin Ćaće; niti ko je Ćaća – osin Sin i ni ken Sin oće da se obznani."
Ondac se obrne skulariman pa nin je nasamo reka: "Blago ga se jočiman ča gledadu ča vi gledate! Govorin van: puste su profete i kraji tili vidit ča vi gledate, ma nisu vidili; i čut ča vi slušate, ma nisu čuli!"

Befel ol jubavi
Nu gledaj, niki ki je poznava regule usta se je i, kako bi ga tašta, zapita ga je: "Meštre, ča mi je činit za jemat život višnji?" A on mu je reka: "Ča je zdatano u Reguli? Kako štiješ?" Ni mu je olgovori: "Vȍl Gospodȉna Boga svojega cilin srcen svojin, i cilin animon svojin, i cilon forcon svojon, i cilon pamećon svojon; i svojega bližnjega ka samega sebe!" Reka mu je na to Isukrst: "Lipo si olgovori. Čin tako i živit ćeš."

Smilovani Šamarijanac
Ma, želeć nać kavadinu, reka je on Isukrstu: "A ko je moj bližnji?" Isukrst je zausti i reka:
"Niki čovik skalava se je iž Jeruzolima u Jerihon. Upa je meju škanjažine ki su ga isvukli, izruvinali i išli ća ostaveć ga deboto mrtvega. Tin je puten skalavajuć se nabasa na nje niki pop, pogleda ga i zaobijde ga. A tako i levit: prohodeć nuda, vidi ga je i mimojiša. Niki Šamarijanac putujuć dojde do njega, upana ga je, aveli se je pa mu se kušta i zamota zledi oblijuć jih ujen i vinon. Ondac ga je užjaha na svoje žĩvo, odve ga je u oštariju i tetoši ga je. Izjutra je izvadi dva dinara, da jih je oštaru i reka: 'Pobrin se za nje. Je ča višje potrošiš, platit ću ti kal se tornan.'"
"Ča ti se čini, ki je ol va tri bi bližnji nen ča je bi upa meju škanjažine?" On je olgovori: "Ni, ki mu je iskaza graciju." Na to mu je reka Isukrst: "Hod pa i ti čin tako!"

Marta i Mare
Doklen su ni tako bili na vijaju, ulize on u jelno selo. Nika žena, ča se je zvala Marta, primila ga je u kuću. Jemala je sestru ča se je zvala Mare. Na je sela do nog ol Gospodȉna i slušala je njegove beside. A Marta je bila sva deletana kolo posluživanja pa prijde i reče: "Gospodȉne, a ne haješ ča me je sestra ostavila da sama poslužijen? Dunkve, rec non da mi pomože." Olgovori non je Gospodîn: "Marta, Marta! Bacelaš i ludiš se za veleti tega, ma je jelno potribno. Za reć svu istinu, Mare je izabrala boji dil, ki non se neće vazest."

Učenje obo moljenju
11 Jedan put se je Isukrst na niken mistu moli. Čin je ferma, reka mu je jedan ol skularih: "Gospodȉne, nauč nas molit ka ča je i Ivo nauči svoje skulare." On nin je reka: "Kal molite, govorte:
'Ća!
Neka je posvećeno ime tvoje!
Neka dojde krajestvo tvoje!
Kruh naš svakidašnji
daj nan svakega dneva!
I olmolaj nan sagrišenja naša:
jerbo i mi olmolajemo
svaken ča je prama namim u dugu!
I ne uved nas u tantacijun!'"

I reka nin je: "Ko to ol vas jema vakega prijateja? Pojde ki njemu kolo po noća i reče mu: 'Prijateju, zajmi mi tri kruha. Prijatej mi je svrnu sa vijaja i niman česa metnut prida nje!' A ni mu iznutra olgovori: 'Ne faštidijaj me! Vrata su jurve zaklopjena, a dičica s menon u posteji. Ne mogen ustat se da ti dan…' Govorin van: je se i ne ustane da mu dã zarad tega ča mu je prijatej, ustat će se i dat će mu ča mu god triba zarad njegovega faštidijavanja."
"I ja vamin govorin: Zapitajte i dat će van se! Išćite i nahodit ćete! Kucajte i olprit će van se! Za reć pravo, kogod pita, prima; i kogod išće, najde; i nen ki kuca, olprit će se."
"A ki je to ćaća meju vamin: kal mu sin zaišće ribu, a će mu zanamisto ribe dat guju? Oli kal zapita jaje, a će mu dat macagrabuna? Je dunkve vi, makar i zli, užate dobrin dariman darivat dicu svoju, koko će višje Ćaća s nebes nasitit Svetin Duhon ne ča ga zaišćedu!"

Isus i Beelzebul
I laska je vraga ki je bi mutav. Pokle je izliza đaval, mutavi je progovori. I vas svit se je divi. A niki ol njih su rekli: "Po Beelzebulu, glavešini vražjon, laska vrage!" A drugi su tantajuć ga, išćali ol njega kakov sinjal s nebes. Ma on, znajuć njihove pensire, reče nin: "Svako krajestvo razdiljeno u sebi opustit će i kuća će po kući past. Je dunkve Đaval u sebi razdiljen, kako će se uzdržat krajestvo njegovo? Jerbo vi govorite da ja po Beelzebulu laskan vrage. Je dunkve ja po Beelzebulu laskan vrage, po komu jih vaši sini laskadu? Zarad tega ćedu van ni bit jurati. Ma, je ja prston ȍl Boga laskan vrage, propja je došlo ki vamin krajestvo ȍl Boga."

"Doklegod jaki pod oružjen čuva svoju kuću, u miru je vas njegov poces. Ma, je dojde žešći ol njega, sputi ga i vazme mu svo njegovo oružje u ko se je ufa, a lupešćinu razdili."
"Ko ni su menon, kontra meni je. I ko su menon ne prikupja, rasipje."

Jopeta padanje

"Pokle zli duh izlize iž čejadina, luta po stinjiviman mistiman išćeć spokoja. Kal ga ne najde, reče: 'Tornat ću se u kuću iz ke san izliza.' Tornajuć se, najde je pometenu i pripomordinanu. Ondac gre ća i vazme su sebon sedan drugih animih, gorih ol sebe, pa ulizedu i alogadu se tote. Na kraju bilo je nen čejadinu gore vengo u počelu."

Pravo blaženstvo

Doklen je on to pravja, zaviče nika žena iz pustega svita: "Neka bude blažen drob ki te je nosi i sise ča si jih sisa!" On je olgovori: "Jošćec blaženiji ni ki obadajedu besidu ȍl Boga i hranidu je!"

Sinjal ol Jone
Kal je navali pusti svit, sta nin je Isukrst pravjat: "Vi đeneracijun, đeneracijun je ispod sebe. Traži sinjal, ma mu se sinjal neće dat osin sinjala Joninega. Za reć pravo, ka ča je Jona bi sinjal Ninivjaniman, tako će bit i Sin Čovičanski ven đeneracijunu."
"Krajica će ol Juga ustat se na Tribunalu s judiman vega đeneracijuna i kaštigat će jih jerbo je su krajih ol zemje došla čut mudrost ol Salamuna, a na, evo vode je i višje ol Salamuna! Ninivjani ćedu se ustat na Tribunalu so vin đeneracijunon i kaštigat ćedu ga jerbo su se obrnuli na prediku ol Jone, a na, evo vode je i višje ol Jone!"

Druga glenda obo šteriki
"Nikor ne užgimje šteriku kako bi je metnu u kantun oli pol sud, vengo na kandilir kako bidu ni ča ulizijedu vidili luminažitad. Joko je šterika tilu tvojen. Kal ti je joko ćaro, svo tilo ti je svîtlo. A kal je joko nevajano, i tilo ti je škuro. Dunkve atento, kako luminažitad ča je u tebi ne bi bila škureca. Je ti dunkve svo tilo bude svîtlo, brez pinkicu škurece, bit će skroz svîtlo, ko kal te šterika svojin luminacijunon ilumina."

Kontra farižejih i meštrih ol Regule
Doklen je on govori, pozva ga je niki farižej u sebe doma na obid. On ulize i prijde ki stolu. Kal je to vidi, farižej se je inkanta, jerbo se Isukrst prin obida ni bi opra. A Gospodîn mu je reka: "Je, vi farižeji perete izvanka žmule i tase, a iznutra ste puni ingordije i malicije. Buzdoti! A nĩ nî ki je izvanka sve učini, učini sve i iznutra. Vengo, dajte za lemozinu no iznutra i nu gledaj – sve van je ispuliškano."

"Ma, ja van se radujen, farižeji! Namirili ste desetinu ol metvice i rute i svake vrste povrća, a ni vas briga za pošćenje i jubav ȍl Boga. Vo je tukalo činit, a no ne zapustit."
"Ja van se radujen, farižeji! Volite prvi banak u sinagogan i da van se daje reta na pijacan. Ja van se radujen! Vi ste ka grebi ča se ne vididu i po kojiman judi ne znajuć gazidu."
Na to će mu niki meštar ol Regule: "Meštre, tako govoreć i nas si uvridi." A on nin je reka: "Ja se radujen i vamin, meštri ol Regul! Prtite na jude piz ča ne mogedu podnit, a sami ni da jih jednin prston pipnete."

"Ja van se radujen! Dižete štatue profetan, a vaše su jih ćaće pobile. Zarad tega ste svidoci i potvrđijete dila svojih ćaćih: ni su jih ubili, a vi štatue poldižete! Zarad tega je i govorila Mudrost ȍl Boga: 'Poslat ću ki njiman profete i apoštole. Nike ćedu pobit i prognat – kako bi se ol vega đeneracijuna išćala krv svih profetih prolivena ol počela ol svita, ol krvi Abelove do krvi Zakarijine, kega su ubili meju oltaron i svetišćen.' Je, govorin van, išćat će se ol vega đeneracijuna!"

"Ja van se radujen, meštri ol Regul! Vazeli ste kjuč ol pameti: sami niste ulizli, a niste dali ni niman ča su tili ulist."
Kal je Isukrst izliza odande, stali su pismoznanci i farižeji žeštoko na nje navalivat i postavjat mu pusta pitanja panajuć na nje, kako bidu čagod ćapali iž njegovih just.

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ Petra Katančića, Ivana Matije Škarića, Valentina Čebušnika, Ivana Evanđelista Šarića, Ljudevita Rupčića i Gracijana Raspudića, te latinske Vulgate, talijanske La Bibbia di Gerusalemme i francuske La Bible de Jérusalem)