Čakavska Biblija 271

Nemoj tantat Gospodȉna, Boga svojega!

Nemoj tantat Gospodȉna, Boga svojega!
ILUSTRACIJA

Evanđeje po Luki

II. Parićavanje Isukrstovega dilovanja

Predikavanje Ivota Krstiteja
3 Petnajestega godišća vlasti cesara Tiberijeta, doklen je guvernant Judeje bi Poncije Pilat, tetrarh Galileje Irud, a njegov brat Filip tetrarh Itureje i zemje trahonitidske, i Lizanije tetrarh Abilene, za velega popa Ane i Kajife, dojde besida Božja Ivotu, sinu ol Zakarije, na trzi. On obajde sve konfine jordanske predikajuć obraćeniške krstice na olpušćenje grihov ka ča je škrivano u Libru ol besid profete Izaije:

Glas se dere na trzi:
Parićajte put Gospodȉnu,
poravnajte mu pasadure!
Svaka prodoca neka se napuni,
svaka gora i brig neka se polehne!
Ča šemuća, neka se poravna,
a gropinavi puti neka se izlišadu!
I svako će tilo vidit šalvanje ȍl Boga.

Dunkve, govorili su pusten svitu ča je dohodi kako bi se krsti: "Gujin rode! Ko vas je samo averti da bižite ća ol grinte koliko sutra? Donišate dunkve frute dostojne obraćenja. I nemojte počet u sebi govorit: 'Jemamo ćaću Abrama!' Jerbo, govorin van: Bog iž vega kamenja moge podišat dicu od Abrama. Sikira je jurve metnuta nada hreb cabliman: svako dunkve cablo ča ne donosi dobrega roda siče se i u oganj baca.

Zapita ga je vas svit: "Ča nan je dunkve činit?" On nin je olgovori: "Ko jema dvi vešte neka podili su nin ki nima. U kega jema spize, neka učini isto tako." Došli su se krstit i ni sa dugane pa su ga zapitali: "Meštre, ča nan je činit?" Reka nin je: "Nemojte naplaćivat višje vengo ča je izmireno." Zapitali su ga i soldati: "A namin, ča je namin činit?" Reka nin je: "Nikomu ne činte ča se neće, nikoga krivo nemojte okužavat i budte kuntenti sa svojon dobićon."

Puk je bi u iščekivanju i svi su se ȕ srcu bili zapitali obo Ivotu da ni brž on Isukrst. Zato nin je Ivo sviman reka: "Ja vas, za reć pravo, krstijen vodon. Ma, dohodi žešći ol mene. Ja nisan kapac ni odrišit mu kordune na postoliman. On će vas krstit Svetin Duhon i ognjen. U ruci mu je badilo da ispuliška gumno svoje i skupi šenicu u žitnicu svoju, a plivu će izgorit ognjen ča se ne da udunut." I su veleti je drugih glendih Ivo navišća puku evanđeje.

A Iruda je tetrarha Ivo kritikova zarad Irudijade, žene njegovega brata i zarad svih njegovih zlih dilih. Sven ten užunta je Irud jošćec i vo: zapunta je Ivota u katabuju.

Isukrstove krstice
Kal se je krsti vas puk, krsti se je i Isukrst. I doklen se je moli, rascvala su se nebesa, skala se je na nje Sveti Duh kako da se je u tilo diventa, koda golub, a glas se je s nebes prodera: "Ti si Sin moj, Jubjeni! U tebi mi je sva milinȁ!"

Postanje Isukrstovo ol Regule
Kal je Isukrst nastupi, bilo mu je koda trideset godišćih.
Bi je – kako se pensalo – sin ol Bepota, sin Elijev, Matatov, Levijev, Malkijev, Janajev, Bepotov, Matatijin, Amosov, Naumov, Heslijev, Nagajev, Mahatov, Matatijin, Šimijev, Josehov, Jodin, Johananov, Resin, Zerubabelov, Šealtijelov, Nerijev, Malkijev, Adijev, Kosamov, Elmadamov, Erov, Jošujin, Elijezarov, Jorimov, Matatov, Levijev, Šimin, Judin, Bepotov, Jonamov, Elijakimov, Melejin, Menin, Matatin, Natanov, Davidov, Jišajev, Obedov, Bojazov, Salin, Nahšonov, Aminadabov, Adminov, Arnijev, Hesronov, Peresov, Judin, Jakin, Izakov, Abramov, Terahov, Nahorov, Serugov, Reuov, Pelegov, Eberov, Šelahov, Kenanov, Arpakšadov, Šemov, Nojin, Lamekov, Metušalahov, Henokov, Jeredov, Mahalalelov, Kenanov, Enošev, Šetov, Adamov, Božji.

Tantacijun na trzi
4 Isukrst se je, pun Svetega Duha, torna nase sa Jordana i Duh ga je četrdeset dnevih vodi po trzi, di ga je tanta đaval. Tih dnevih ni ničesa ji, pa kal su ni pasali, ogladni je. A đaval mu je reka: "Jes ti Sin ȍl Boga, rec von stinji da se deventa u kruh." Isukrst mu je olgovori: "Škrivano je: Ne žive čejade samo obo kruhu."
I odvede ga vrag na visoko, pokaže mu ujedanput sva krajestva ol zemje i reče mu: "Tebi ću dat svu vu vlast i slavu njihovu jerbo je meni dana i komugod oću, dajen je. Dunkve, je se budeš prida menon pokloni, sve je tvoje. Isukrst mu je olgovori: "Škrivano je:
Priginj se Gospodȉnu, Bogu svojen,
i njemu jedinen bud šerva!"

Odvede ga u Jeruzolim i metne ga na vrh Tempala pa mu reče: "Jes ti Sin ȍl Boga, bac se odavde doli! Jerbo je notano:
Anđeliman će svojiman naredit za te
da te čuvadu.
I: Na rukan ćedu te nosit
da se di nogon ne biš pošešunu obo stinju."
Olgovori mu je Isukrst: "Rečeno je:
Nemoj tantat Gospodȉna, Boga svojega!"
Pokle je potroši sve tantacijune, đaval se je odaleči ol njega do nike druge prilike.

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ Petra Katančića, Ivana Matije Škarića, Valentina Čebušnika, Ivana Evanđelista Šarića, Ljudevita Rupčića i Gracijana Raspudića, te latinske Vulgate, talijanske La Bibbia di Gerusalemme i francuske La Bible de Jérusalem)  

 

Komentari: 0

Samo registrirani korisnici mogu komentirati.