Čakavska Biblija 278

Pismoznanci i farižeji. Ćoravi kâpoti!

Pismoznanci i farižeji. Ćoravi kâpoti!
ILUSTRACIJA

Evanđeje po Mati

Glenda obo fešti ol matrimonija
22 Isukrst nin je jopeta pravja u glendan: 2"Krajestvo je nebesko ko kal niki kraj parića pir svojen sinu. 3Posla je šerve da pozovedu pirane na pir. Ma, ni nisu tili doć. 4Jopeta je posla druge šerve govoreć: 'Recte niman ča su pozvani: Evoga, obid san parića. Junice moje i svo ugojeno blago jurve su poklani i sve je parićano. Dojdite na matrimonij!'"
5"Ma ni, ne hajuć, išli su ća – jedan na svoju ogradu, drugi za svojin poslon. 6Ni drugi ćapali su njegove šerve, izgadili su jih i ubili. 7Na to se je kraj izvitoperi, posla je svoje soldate i da je pobit ne ašašine, a grad nin je zapali."

8"Ondac kaže šervan: 'Matrimonij je, evo na, parićan, ma ni pozvani nisu se baš tega dostojili. 9Pojte, zarad tega, na raskrsnice, i koga god najdete pozovte ga na matrimonij!'"
10"Šerve su izašle na pute i iskupili su sve na ča su naletili – i zle i dobre. I sala ol matrimonija napunila se je gostijuh. 11Kal je kraj uliza pogledat goste, upana je nonde čovika ča ni bi ubučen u robu ol matrimonija. 12Reka mu je: 'Prijateju, kako to da si vamo uliza brez robe ol matrimonija?' A on je zanimi. 13Ondac kraj reče niman ča su posluživali: 'Sput'te mu ruke i noge i butajte ga vanka u tmicu, di će bit hlencanje i strganje zubiman.' 14Za reć pravo, veleti je pozvanih, ma je pinku nih proberenih."

Dacije cesaru

15Ondac su farižeji išli ća i učinili su šedutu kako da Isukrsta ćapadu u besidi. 16Poslali su ki njemu svoje skulare sa irudovciman da ga zapitadu: "Meštre! Znamo da si ti ol prava i da po putu ol prava Božjega učiš, i ne haješ vele ko je ko jerbo si pošćen. 17Rec nan, dunkve, ča ti se čini: je dopušćeno dat dacije cesaru, oli ni?"
18Znajuć njihovu pokvarenost, reka je Isukrst: "Zarad čega impicajete u me, falšitadi judska? 19Pokažte mi šolde ol dacije!" Prikazali su mu dinar. 20On jih zapita: "Čihov je vo litrat i zapis?" 21Olgovorili su mu: "Cesarev." Kaza nin je: "Dajte dunkve cesaru cesarevo, a Bogu no ol Boga."
22Kal su to čuli, zadivili su mu se pa su ga ostavili i išli ća.

Uskrsnuće mrtvacih

23Tega dneva prišli su ki njemu saduceji, ki su govorili kako nima uskrsnuća, pa su ga zapitali: 24"Meštre, Mojsije je reka: Je umre ko brez dice, neka se njegov brat oženi njegovon ženon i poldigne rod bratu svojen. 25Bilo je tako u nas sedmero braće. Prvi se je oženi i umri brez poroda ostaveć ženu svojen bratu. 26Tako i drugi i treći, sve do sedmega. 27A poslin svih umrla je i žena. 28Ken će dunkve ol te sedmorice bit žena po uskrsnuću? Jerbo su je sva sedmorica jemala."

29Olgovori nin Isukrst: "Zafrkali ste se jerbo ne kapite ni Pisam ni force ol Boga. 30Jerbo, obo uskrsnuću niti ćedu se ženit niti udavat, vengo ćedu bit ka anđeli na nebesiman. 31A ča se tiče uskrsnuća mrtvacih, a niste štili ča van je reka Bog: 32Ja san Bog ol Abrama, Bog od Izaka i Bog ol Jake? Ni on Bog ol mrtvih, vengo ol živih!"
33Kal je to sve ču, vas svit osta je zablenut njegovin učenjen.

Najveći befel
34A kal su farižeji čuli kako je umuka saduceje, okupili su se, 35a jedan ol njih, ča je zdatava regule, kako bi ga natanta, zapita ga je: 36"Meštre, ki je befel najveći u Regulan?" 37A on mu je reka: „Jub Gospodȉna Boga svojega cilin srcen svojin, i cilon dušon svojon, i cilon pamećon svojon. 38To je najveći i najprvi befel. 39Drugi, ven slišan: Jub svojega bližnjega ka sebe samega. 40Obo ta dva befela visi cila Regula i Profete."

Isukrst, sin i Gospodîn ol Davida

41Kal su se farižeji skupili, zapita jih je Isukrst: 42"Ča pensate obo Isukrstu? Čihov je on sin?" Kazali su mu: "Ol Davida." 43A on će njiman: "Kako to da ga ondac David zove Gospodȉnon, kal govori:
44Reka je Gospodîn Gospodȉnu mojemu:
'Sed mi na desnu bandu
doklen ne položin dušmanine tvoje
za fundamente nogan tvojiman'?
45Je ga dunkve David nazva Gospodȉnon, kako mu je sin?" 46I nikor mu ni moga olgovorit ni beside, niti je ol tega dneva bi ko kapac pitat ga bilo ča.

Falšitad i tašćina pismoznancih i farižejih
23 Ondac Isukrst progovori sven svitu i svojiman skulariman: 2"U katridu ol Mojsijeta zaseli su pismoznanci i farižeji. 3Činte dunkve i držte sve ča van budedu govorili, ma nemojte se vodit po njihovin diliman jerbo obo njiman govoridu, a ništa ne činidu. 4Vežijedu i judiman na špale prtidu teška brimena, a sami ni da bidu jih prston makli. 5Sva svoja dila činidu zarad tega da jih judi vididu. Za reć pravo, širidu svoje spise i razvučijedu bordure na pandiliman. 6Volidu počasna mista na frajan, prve banke u crikvan, 7pozdravjanja na pijacan i da jih judi zovedu 'Rabbi'.

8Vi, inšoma, nemojte se dat zvat 'Rabbi', jerbo jedan je meštar vaš, a vi ste svi braća. 9Ni ćaćon nemojte zvat nikoga na zemji jerbo jedan je Ćaća vaš – ni na nebesiman. 10I nemojte dat da vas kâpotiman zovedu, jerbo jedan je vaš kâpo – Isukrst. 11Najveći meju vamin neka van bude šerva. 12Ko se god želi uzvisit, bit će ponižen, a kogod se bude tit ponizit, bit će uzvišen."

"Pismoznanci i farižeji: ja van se radujen!"
13"Pismoznanci i farižeji: ja van se radujen!" Falšitadi judska! Zaklapate krajestvo ol nebes pril judiman; vi sami ne ulizijete, a ne date ulist ni niman ki bidu tili."
14"Pismoznanci i farižeji: ja van se radujen! Falšitadi judska! Žderete kućišća od udovic pravdajuć se dugaškin molitvan. Zarad tega vaš će kaštig bit veći."
15"Pismoznanci i farižeji: ja van se radujen!" Falšitadi judska! Obahodte i moren i tarafermon kako biste zadobili jelnega ča će hodit za vamin. A pokle ga zadobijete, prizentajete ga u sina paklenega duplo gorega ol sebe."

16"Oboj vamin! Ćoravi kâpoti! Govorite: 'Je se ko zakune Tampalon, ni to ništa. Ma, je se zakune zlaton ol tempala, vežije ga prisega.' 17Šempije i ćoravci! Jerbo, ča je veće: zlato oli Tempal ča posvećije zlato? 18I daje: 'Je se ko zakune oltaron, ni to ništa. Ma, je se zakle daron ča je na njemu, vežije ga prisega.' 19Ćoravci! Jerbo, ča je veće: dar oli oltar ča dar posvećije? 20Ko se dunkve zakune oltaron, kune se š njin i sa svin nin ča je na njemu. 21I ko se zakune sa Tempalon, kune se š njin i Nin ča u njemu žive. 22I ko se kune nebesiman, kune se pristojen ol Boga i ol Nega ki na njemu sedi."

23"Pismoznanci i farižeji: ja van se radujen! Falšitadi! Namirijete desetinu ol metvice i kopara i kima, a propušćate najvažnije u Reguli: pošćenje, pomilovanje, virnost. Vo je tribalo činit, a no ne propušćat. 24Ćoravi kâpoti! Cidite komara, a gucate devu!"
25"Pismoznanci i farižeji: ja van se radujen! Falšitadi! Puliškate žmul i tas izvanka, a iznutra su krcati grabežine i ingordije. 26Ćoravi farižeju! Puliškaj najprvo žmul iznutra da mu i no izvanka bude puliškano."
27"Pismoznanci i farižeji: ja van se radujen! Falšitadi! Sličite na obiljene grebe. Izvanka paridu lipi, a iznutra su krcati košća ol mrtvacih i svakakove šporkice. 28Tako i vi izvanka judiman parite pošćeni, a iznutra ste krcati su falšitadi i grihon."

29"Pismoznanci i farižeji: ja van se radujen! Falšitadi! Gradite grebe profetan i infjorajete štatue pravedniciman 30pa govorite: 'Da smo mi živili u dneviman svojih ćaćih, ne bismo š njiman jemali učešća u prolivanju krvi ol profetih.' 31Tako sami kontra sebi svidočite kako ste sini ašašinih ol profetih. 32Nadomistite samo miru ćaćih svojih!"

Kaštig, dominuta
33"Guje! Gujin rode! Kako ćete uteć šentenci ol pakla? 34Zarad tega, evoga, ja šajen vamin profete i filožofe i pismoznance. Jelne ćete ol njih ubit i razapet, druge ćete išibat po svojiman crikvan i izagnat jih ol grada do grada 35kako bi tako na vas došla sva pravedna krv, prolivena na zemji od Abela pošćenega pa do krvi ol Zakarije, sina ol Barahije, kega ste ubili izmeju Tempala i oltara. 36Za reć pravo, govorin van, sve će to doć na vu vrst!"

Kritika Jeruzolimu

37"Jeruzolime, Jeruzolime, ča ubiješ profete i stinjan tučeš ne ča su se tebi poslali! Koko putih ti san skupit dicu svoju ko ča kvoška skupja pipliće pol krila, pa niste tili. 38Evo na, napušćena van kuća. 39Za reć pravo, govorin van, olsada me nećete vidit doklegod ne budete rekli: Blagoslovjen Ni, ki dohodi u ime ol Gospodȉna!"

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ Petra Katančića, Ivana Matije Škarića, Valentina Čebušnika, Ivana Evanđelista Šarića, Ljudevita Rupčića i Gracijana Raspudića, te latinske Vulgate, talijanske La Bibbia di Gerusalemme i francuske La Bible de Jérusalem)  

Komentari: 0

Samo registrirani korisnici mogu komentirati.