Čakavska Biblija 247

Predikat vaja dreto-šćeto i ne brez kuraja

Predikat vaja dreto-šćeto i ne brez kuraja
ILUSTRACIJA

Evanđeje po Mati

2. BESIDA OD APOŠTOLIH

Ustanovjenje njih dvanajest
10 Dozva je njih dvanajest svojih skularih i napuni jih je vlašćon nada zlin dusiman: da ih izlaskadu i da olzdravidu svaku malatiju i svaku slabost.
2A vo su imena njih dvanajest apoštolih: najprvi Šime, ča su ga zvali Pere, i Andrija, brat njegov; i Jako, sin ol Zebedeja, i njegov brat Ivo; 3Filip i Bartul; Toma i Mate sa dugane; Jako ol Alfeja i Tadij; 4Šime Kananaj i Juda Iškarijoski, ki ga je bi izda.

Poslanje njih dvanajest

5Njih dvanajest posla je bi Isukrst navinjajuć jih: "Ki poganiman ne holte i ni u jedan Šamarijski grad ne ulizijte! 6Rađe pojte za izgubjeniman ovcan ol doma Israjilovega! 7Puten predikajte: 'Kuštaje se pomalo krajestvo ol nebes!' 8Ne marote ličte, mrtvace uskrisijte, gubave puliškajte, hudobe izlaskajte! Mujta ste dobili, mujta i dajte! 9Ne skupjajte zlato, ni slebro, ni mesing sebi za pason, 10ni valiže, ni dvi vešte, ni postole, ni bagulinu. Jerbo, mirita težak spizu svoju."

11"U kigod grad oli selo da ulizete, dobro vijte ko je u njemu bogustvoren: nonde ostante doklegod odatle ne idete ća. 12Kal budete ulizivali u ku kuću, zaželte non mir. Je kuća bude dostojna, neka se mir vaš skala na nje. 13A je ne bude dostojna, neka se mir vaš torna vamin nase. 14Di vas ne budedu tili primit i ne budedu tili poslušat vašu besidu, izajdite iž te kuće oli grada i otreste prašinu sa svojih nog. 15Stvarno van govorin, lašnje će bit zemji ol Sodome i non ol Gomore na Sudnji dnev, vengo ten gradu."

Apoštole čeka izagnanje
16Na, ja vas šajen ka ovce meju vuke. Budte dunkve mudri ka guje, a dobričine ka golubice! 17Čuvajte se čejadinih, jerbo ćedu vas pridavat vićiman i po svojiman ćedu vas crikvan išibat. 18Pril guvernante i kraje privodit ćedu vas akonto mene, za teštimonijancu njiman i poganiman. 19Kal vas pridadedu, nemojte se sekirat kako ćete oli ča govorit. Dat će van se u ni momenat ča ćete jemat reć. 20Jerbo, ne govorite to vi, vengo Duh Ćaće vašega to govori u vamin!"

21"Brat će brata pridavat nasmrt i otac dite. Dica ćedu ruku dizat na roditeje i ubijat ćedu jih. 22Svi ćedu vas nenavidit zarad imena mojega. Ma, ko ne bude štufajica doklen se sve ne finije, bit će šalvan."
23"Kal vas stanedu progonit u jelnen gradu, bižte ća u drugi. Stvarno van govorin, nećete obać gradov israjilskih prin vengo ča dojde Sin Čovičanski."
24"Ne more bit skular nada svojin meštron niti šerva povrh gospodara svojega. 25Dosta je da skular bude kako njegov meštar i šerva ko njegov gospodar. Jesu gospodara prozvali Belzebubon, moreš pensat kako ćedu ondac nazvat ne š njin u kući?"

Predikat vaja dreto-šćeto i ne brez kuraja
26"Dunkve, ne bojte jih se. Jerbo niti je ča sakriveno ča se neće razaznat, niti je ča segreto ča se neće doznat. 27Čagod van govorin u tmici, recte na svitlu; i ča čujete nauho, predikajte s vrha kuć."
28"Ne bojte se nih ča ubijedu tilo, jerbo duše ne moredu ubit. Bojte se višje nega ča more i dušu i tilo izgorit u paklu."

29"A se ne baratajedu dva orepca za jedan šolad? Pa jopeta, ni jedan ol njih ne pade na zemju brez Ćaće vašega. 30A vamin su i vlasi na glavi svi izbrojeni. 31Dunkve, ne bojte se! Vridniji ste vengo more orebac."
32"Kogod se, dunkve, mojin pristavi prid judiman, priznat ću se i ja njegovin pril Ćaćon ča je na nebesiman. 33A ko se odreče mene prid judiman, odreć ću se i ja njega prid svojin Ćaćon ča je na nebesiman."

Velo razdilivanje svita: zarad čega progonjenje apoštolih

34"Nemojte pensat da san ariva mir donit na zemju. Ne, nisan doša donit mir, vengo mač. 35Jerbo, doša san rastavit čovika od ćaće njegovega i ćer ol matere njezine i nevistu ol sekrve njezine; 36i dušmani ol čovika ćedu se deventat u ne ča ćedu stat skupa š njin u kući."

Vaja se svega odreć
37"Ko voli ćaću oli mater svoju višje vengo mene, ni me dostojan. Ko voli sina oli ćer višje vengo mene, ni me dostojan. 38Ko ne vazme svoj križ i ne gre za menon, ni me dostojan. 39Ko najde svoj život, izgubit će ga, a ko izgubi svoj život zarad mene, nać će ga."

Zakjučenje beside od apoštolih

40Kogod vas je primi, mene je primi; a ko god je primi mene, primi je nega ki je mene posla. 41Ki je primi profetu jerbo je profeta, primit će plaću ol profete; ko je primi poštenjačinu zarad tega ča je pošten, primit će plaću ča se pristoji taken. 42Kogod napoji jelnega ol vih najmanjih dabi su žmulon studene vode zato ča je moj skular, stvarno van govorin, neće mu isagnjit dobića."


IV. Šegreto ol novega Božjega svita

1. PRIPOVIDANI DIL

11 Pokle je Isukrst svrši zapućivat njih dvanajest svojih skularih, iša je ća odande podučavat i predikat daje po njihoviman gradoviman.

Pitanje i teštimonijanca Ivotova
2A kal je Ivo u pržunu doćuka za dila Isukrstova, posla je svoje skulare 3da ga pitadu: "Jes ti Ni ki jema doć, oli da drugega čekamo?" 4Isukrst nin je olgovori: "Pojte i javte Ivotu ča ste čuli i vidili: 5Ćoravi su progledali, ni ča su čopali sadar gredu ravno, ogubavjeni se puliškadu, oglušeni čujedu, mrtvaci se ustajedu, siromasiman se navišća Evanđeje. 6I blago ga se nen ko se ne prenerazi zarad mene."

7Kal su ni išli ća, poče je Isukrst pravjat svitu obo Ivotu: "Ča ste izlizli na trzu gledat? Trstiku ča je vitar gingolaje? 8Oli ča ste izlizli vidit? Čejade uteplo ubučeno? Na, ni ča su se uteplo ubukli po krajevskin su palaciman. 9Oli ča ste izlizli? Vidit profetu? Je, govorin van, i višje vengo profetu. 10On je ni obo ken se je zdatavalo:
Na, ja šajen čauša svojega
prid facon tvojon
da poravna put prida tebon.

11Stvarno van govorin, meju rođeniman ol žene ni se je usta veći od Ivota Krstiteja. Pa jopeta, i najmanji u krajestvu ol nebes veći je ol njega. 12A ol dnevih Ivota Krstiteja do sadar krajestvo ol nebes na silu se ćapaje i komita ga zaposve zapasaje. 13Za reć pravo, sve profete i sve Regule proricali su sve do Ivota. 14Inšoma, je oćete: on je Ilija ča jema doć."
15"Ko jema ušesa, neka čuje."

Isukrstovo pensanje obo njegoviman iž đeneracijuna
16"A sa kin da usporedin vi đeneracijun? Sliči na dicu ča sedidu na pijacan pa jelni drugiman dobacijedu:
17'Zasvirali smo van, a vi niste zabalali,
zahlencali smo, a vi niste zaplakali.'"
18"Stvarno, dojde Ivo. Ni ni ji ni pi, a govori se: 'Đaval postoji'. 19Dojde Sin Čovičji ki i ji i pije, a govori se: 'Pogledaj, žderonje i pijančine, prijateji i duganjerih i grišnikov!' Ma, opravdala se Mudrost diliman svojiman."

Prićenje neobraćeniman gradoviman
20Ondac stane kritikovat grade u kiman se dogodilo najviše njegovih mirakulih, a ni se nisu obratili: 21"Ja ti se radujen, Korozajine! Ja ti se radujen, Betsajido! Da su se u Tiru i Sidonu dogodili mirakuli ča su se dogodili u vamin, oldavna bidu se ni u kostreti i lugu bili obratili. 22Ma, govorin van: Tirotu i Sidonu bit će na Sudnji dnev lašnje vengo vamin."
23"I ti, Kafarnajume! A ćeš se do nebes uzvisit? Doli do u pakal ćeš se surgat! Stvarno, da su se u Sodomi dogodili svi ni mirakuli ča su se dogodili u tebi, fermali bidu se ni sve do dneva današnjega. 24Ma, govorin van: Zemji ol Sodome bit će Sudnji dnev lašnji vengo tebi."

Evanđeje jelnostavniman
25U na doba reče Isukrst: "Falin te, Ćaća, Gospodaru i nebes i zemje, ča si vo sakri ol mudrih i pametnih, a obistini niman jobišniman. 26Je, Ćaća, tako se tebi svidilo. 27Sve je meni prida Ćaća moj i nikor ni pripozna Sinka osin Ćaće, niti je ko pripozna Ćaću osin Sinka i ni ča mu ga je on želi obznanit."

Depeša ol škrivana
28"Dojdite u mene svi ča ste ispaćeni i nakargani i ja ću van dat da olpočinete. 29Vazmite karag moj na se, učte se ol mene jerbo san mirnega i poniznega srca i nać ćete pokoj dušan svojiman. 30Za reć pravo, karag je moj slalki i brime je moje lagahno."

(Prijevod na čakavštinu bračkih Selaca: Siniša Vuković prema: Jeruzalemska Biblija, Kršćanska sadašnjost, Zagreb 1994., prijevod: Bonaventura Duda i Jerko Fućak; uz konzultacije hrvatskih prijevodâ Petra Katančića, Ivana Matije Škarića, Valentina Čebušnika, Ivana Evanđelista Šarića, Ljudevita Rupčića i Gracijana Raspudića, te latinske Vulgate, talijanske La Bibbia di Gerusalemme i francuske La Bible de Jérusalem)

Komentari: 0

Samo registrirani korisnici mogu komentirati.